好耐都無打日記, 係時候要 update 一下, mo 仔唔經唔覺已經一歲, 大過仔咗, 明白我地講嘢, 可以同佢有 two way communication, 已家已經行得好定同好穩陣, 咁晚同佢玩 ball ball, 佢識單手攞起, 然後你叩佢比姑媽, 爺爺, 嫲嫲, 爸爸, 佢全部都認得, 比啱曬, 我都覺得好出奇, 點解佢會識架呢, 可能我地成日同佢講, 呢個係邊個邊個, 漸漸佢已經記得, 老婆放工, 講咗另一件事我聽, 我仲 suprise, 佢原來認得曬好多屋企唔同地方, 同埋係果到做啲咩, 真係無諗過佢會記得曬呢啲嘢, 可能一歲之後嘅學習可能力真係高好多, 細路仔, 果然好勁....
遲啲印印就會上班, 我真係超唔習慣, 有時諗起都會唔係好開心, 無啦啦屋企多咗個人, 點搞.. 不過我都知道真係有需要, mo mo 開始大, 我地應該將啲家務比工人做, 等我地有多啲時間同佢玩, 教佢多啲嘢, 咁啲時間先用得有 value, 希望果個印印唔會帶比我地好多 trouble 啦, 保佢大, 正正常常, 唔好蝦我 mo 仔..
家姐真係失業喇, 睇黎佢都真係唔會搵到嘢做, 有時我都會好擔心佢, 因為佢真係唔識因為自己將來打算, 買咗月供基金, 如果唔係阿媽叫佢儲返啲 statement, 佢都真係掉曬, 問佢幾時買, 又話唔知, 發脾氣, 唉.. 我都真係唔知佢驚唔驚第時瞓街, 做細佬, 都要幫佢諗下, 諗咗好耐, 叫佢將啲公積金嘅錢買咗中國銀行, 希望十年後升值幾倍, 到時都有個錢係身, 唔駛乞做兒...
至於我自己, 條 team 啲人一個一個咁 post 去做第二啲 project, 就黎無曬人, 呵呵.. 黠算, 今日無啦啦阿姐話我寫嘢好, 比我去上一個 course, 話上完番黎寫番個 report, 幫公司答 tender 嘅時候吹下水, 賣藥, 搵吓生意, 真係好奇, 我寫嘢狼咩咁好呢, 另外, 好似跟咁多個 boss, 佢地對我印象都唔係好差, 我時時都覺得自己唔得, 但佢地又好似覺得我 ok wor.. 我係咪應該對自己有啲信心呢..? 哈哈, 入黎咁耐, 都好似只係升 SA 嘅第一年無攞過 MR2.. 有啲自豪..
我嘅夢想, 係飛, 從來都無改變過, 好坦白講, 我做嘢好多時都係三分鐘熱度, 但有關飛機嘅嘢, 我樂此不疲, 一本書可以睇幾次, 一個 flight sim game, 可以搞到幾乎天光, 都要搞掂, 我相信每個人都有夢想, 或者咁講, 如果做人無夢想, 無目標, 一世都會胡胡混混, 虛渡光陰, 到老一事無成, 我好想有一日到老可以好自豪同自己或者係仔仔講, 爸爸嘅夢想係咩, 最後都完成咗.. 一生要有目標...但呢樣嘢到目前都無人明白和認同, 前妻, 前女友, 而家老婆, 屋企人, 個個都覺得呢樣只係有錢人 "玩" 嘅嘢, 浪費金錢, 其實我點只想學飛, 我仲想有牌可以帶啲小朋友飛上天, 同埋攞個教練牌, 教人飛, 到時就唔駛比錢飛之外, 仲有錢收, 不過呢個夢想太遙遠喇.. 可能唔係夢想, 而係幻想.. 灰.. 我買咗一隻股票, 希望可以夢想成真...十年之後有無可能呢? 真係唔知.. 除咗錢, 健康都係另外一個 issue, 幾年前做嘅時候, 話個 pulse rate 90 幾, 跳得快, 要做兩次先 pass, 而家再做, 都好驚唔 pass, 可能發現自己有病, 點算呢..? 有時望返自己嘅 flight log book, 都好 sad, 可能當時唔係飛咗二十個鐘之後, 就黎 solo, which is a big big milestone, 突然停咗唔飛, 挨埋落去, 而家已經有牌喇... 仲記得果時 instructor 都有啲失望, 問我點解就黎 solo, 先突然唔飛...我都唔知點解, 只可能講, 每個人都有負擔, 要生活養,屋企人.. 凡事豈能盡如人意，但求無愧於心..
沒有留言:
發佈留言