預告..

今日終於收到整電腦嘅 quotation, 個價係我想像之外, 我最初諗住只係整千幾蚊, 但覆返黎嘅價嚇我一跳, 要換過個 LCD 同埋 keyboard.. 成四千幾蚊,咁嘅價錢, 我更係第一時間射個 mail 比我老細啦, 不過連佢都話唔到事, 要問我地嘅大隊長, 唔知佢嘅決定係點, 不過對我黎講, 整唔整都無所謂, 橫掂我都有另外一部 notebook 用, 只係個 LCD 細啲, 睇嘢唔係咁方便.. 有時攞部機返屋企用, 佢嘅 "問題" 就更加明顯喇.. 呵.. 如果真係唔整, 我會唔會有部新機用呢..? 一個好大嘅白日夢, 不過算啦, 而家用緊呢個都仲應付到我嘅需要, 無所謂.

因為今晚要去打邊爐, 所以早啲寫 blog, 其實我今朝已經打咗一次, 只係我聰明得濟, 攞走咗個 charger, 但舊電又廢廢地, chap 一聲, 部腦無咗電, 就即刻收咗皮, 之後我先記起, 打咗嘅嘢未 save. 但已經太遲, 要從頭打過, 頂... 今晚食飯又改咗地點, 話想去九龍, 因為大部份人都係住九龍, 就算飲到 wing wing 地都可以快啲返屋企, 都有道理嘅, 睇黎我都要同小朋友搞個 cocktail party, 佢飲少少酒就會好 high, 上次係台灣都只係飲咗少少啤酒就已經軟賴賴, 塊面紅 blog blog, 好正.. 今晚食飯果間嘢係太子, 叫做小肥牛火鍋活魚專門店, 唔知有咩正海鮮食呢..? 我最鐘意打邊爐, 啲嘢夠鮮味.. 同埋可以食好多唔同種類嘅嘢..而且, 飯, 晚晚係屋企都有得食, 好悶..有時要試啲新嘢.. 只係講食嘢咋, 小朋友唔好亂諗...咁日有個舊同事 send 咗個 mail 黎, 有佢同個仔仔嘅嘅相, 好鬼 cute... 黎緊會約埋兩個舊同事去探佢, 就得啱時間, 我諗住帶埋小朋友去, 介紹吓佢比啲同事識, 確認吓佢嘅地位, 好唔好..?

啱啱又開完會, 又有新嘢做.. 點解而家做嘅嘢我咁唔喜歡架呢? 可能係以前未做過嘅關係,所有嘢對我黎講都好新.. 真係好驚, 聽見某人話要一星期做兩個presales, 答 7 份 tender, 我真係好擔心, 唔通我以後就係做呢啲嘢, 另外而家一個人要睇幾樣嘢, 跟本唔會理你做唔做得切, 時代越進步, 人享受生活嘅時間越少. 今日食晏嘅時候要上普通話, 叫咗死靚仔幫我晚魚柳包餐, 一攞起包薯條, 發覺好唔對路, 只係得半包, 有無搞錯.. 呢次係我食大薯條最細嘅一包..只係得一半, 死靚仔, 你點做事架...

今日同死靚仔講起新黎嘅中坑, 大家都唔知請佢返黎做咩 Q 嘢, 真係咩嘢都唔識, 要啲 team leder 坐係佢隔離教佢, 好似教 fresh grad 咁, 睇見都汗顏.. 不過睇黎都係想整走我, 搵佢黎 replace 我們.. 唉, 心灰.. 我地 team 其實係有好很多奇人，我行去某個今晚一齊食飯嘅男同事個位到吹水，某某女同事走埋黎話，你地今晚好開心喎，　我知佢講緊今晚我地幾條麻 nut 佬出去 happy...一定係某人放風佢知, 係咁嘅情形, 我都只可以扮曬嘢咁話. 咁你都一齊黎啦.. 心諗.. 男人吹水, 你都唔方便係到啦.. 唔知佢講真定講假, 答我 "唔好嘅, 唔黎喇.." 答案係點, 今晚有分曉..

呵, 經過我咁晚嘅努力, 又搞到點半, 終於搵到咩問題裝唔到張 display card 喇, 原來係裝少咗啲 prerequisite software, 其實上次裝嘅時候,都應該發現呢個問題, 只係解決咗之後無寫低, 今次再做又唔記得, 呢個就係我嘅弱點,成日浪費曬啲時間係啲解決過嘅舊問題到...不過.. 最終都搞掂, 好開心, 仲要 download 埋個 "雙西" 食譜, 小朋友, 你唔駛驚喇, 我已經驗過, 無問題, 你黎緊可以慢慢嘆... 　

開心一吓...

故事篇

禮拜天放假，蚯蚓兒子閒著沒事，就把自己切成兩段，對打羽毛球去；
蚯蚓媽媽看到，就把自己切成四段自個兒打麻將去。
無聊爸爸受到兒子與老婆的啟發刺激，卻把自己剁碎在砧板上奄奄一息了...
蚯蚓媽媽聞訊趕來，驚訝又傷心地說：「老公，你這是幹嘛呀！」
蚯蚓爸爸虛弱地說：「我 .......想 ...想 .. 踢場足球」

有兩個年糕黏在一起, 有一天他們終於分開了 ,
他們高興地說：「 Give me five!」
結果又黏起來了.........

有個人係辦公室成日放響屁，同事忍唔住話：「你可唔可以唔出聲？」
然後就見佢坐係度搖黎搖去打冷震，同事就問：「做乜呀你？」
佢話......................「我較左做震機」


短句篇

巴斯光年殺左條龍之後變左咩？　　　
殺龍巴斯

咩植物識溜冰？
花，因為花式 ( 識) 溜冰

皇后似咩？
似廣場，因為皇后像廣場

去中國唱咩？
" 唱 "人民幣

有一塊火腿同一條腸仔放左落同一隻鑊度，點解佢地唔傾計?
因為佢地未熟

讀完中五讀乜？
讀下午

點解唔可以係船上講笑話？
因為個海聽到會笑，咁就會引起海嘯

食乜野昆蟲會瘦？
蟻，因為食蟻瘦

用身體上邊樣野可以修飾雙手？
答案係毛髮（毛髮可修飾的一對手）

1+1 幾時會 =3？
錯個陣

樹邊部份最得閒？ 葉！因為「葉得閒」

聰明人..

呢個世界都真係唔公平, 有人好醒, 又有人好似我咁, 好蠢...今朝食咗我最鐘意嘅蛋治, 之後斯斯然搭小巴返公司,而家我已經比以前懶惰咗好多, 可能真係睇化咗, 唔講你地唔知, 最初係呢間公司, 我自以為自己係同 grade 之中薪水最高嘅, 一路都覺得自己要比人勤力, 因為工作同薪水係應該成正比嘅, 但後來係一個偶然嘅機會, 我發現原來我咁多個人裡面人工最低嘅, 果刻真係勁灰, 自始之後, 我每日返工都只係三成時間做公司嘢, 其他時間就做另外嘅嘢喇, 分別係打 blod 同埋睇一啲我自己有興趣嘅嘢, 有啲人可能會問, 你最終都升咗職, 點解唔比啲心機, 我自己都唔知, 只係發覺我成世人都比人搵笨,比人屈, 比人掉低.. 上星買蟹, 比人騙重量之餘, 介要計多 10%.. 唉... 三百三十蚊買一隻蟹, 而家諗返都覺得自己好過份..因為自己一個人食, 好有罪惡感 tim.. 不過應該唔會再買喇.. 黎緊會整呢個蟹粥加豉油皇炒麵, 點解有咁嘅結構思, 因為咁日同媽媽去稻香飲茶葉, 係個餐牌到見到, 覺得好正, 所以想試吓整... 不如就星期六啦, 小朋友,你食唔食, 如果唔食, 我星期日自己整, 呵呵..

今日某個女同事朝早又 SL, 從佢個 blog 睇黎, 應該又係感情問題居多, 有時真係有衝動係佢個 blog 到留言,叫佢死心, 依本人愚見, 呢啲男仔, 死十個當五傷啦, 人地跟本唔想同你一齊, 你死 lur 都無用, 不過諗真啲, 事不關己,己不勞心,我同佢又唔係好 friend, 仲有, 某情度上,我覺得佢唔多鐘意我, 咁我又何必諸多事實呢.. 呢段嘢係佢個 blog 到抄出黎嘅.. "當你愛一個人的時候，每一樣東西在你眼中都是最好的，就算是壞脾氣和任性，對你來說都不過是好性，孩子氣，當不愛的時候，優點再沒有被你無限放大，反之是無限縮細，無限放大的只有缺點", 感情就係咁架喇,正所謂, 愛嘅反面就係恨...

今日繼續做我個 presentation 嘅 material, 唔多識玩 powerpoint, 想貼張圖, 都搞咗成半個鐘, 最後, 頂唔順, 問咗另外一個同事, 佢真係好叻, 搞咗唔夠一分鍾就搞掂, 唔怪得老細同啲女同事都咁鍾意佢,有錢, 有樓,有車, 有老婆再加個好得意嘅仔仔, 真係咩都有齊喇喎,羨殺身旁人.. 不過, 我都滿足現狀, 有家人, 有小朋友.. 話說回頭, 呢排小朋友成日都話好掛住我喎, 點解呢, 掛住我個人定係啲糖水呢, 嘩, 我而家先知原來佢對除咗鐘意 "椰汁溝西米"..仲鍾意 "雙西- 西瓜溝西米'..咁日就係係網到搵呢個食譜, 搞到我個機好似中毒, 不停 boot 機, 到而家都未搞掂.. 咁晚去接佢放工，話佢知部機死咗, 佢好似好擔心搵唔返個食譜喎, 好驚呀,佢越黎越大食, 會唔會有一日呢個大廚滿足唔到佢架呢..? 黎緊仲要等個同事借隻 winxp sp2　比我裝過，希望部腦好快起死回生。

滿足現狀...

星期六 (陰)
今日好開心咁同小朋友出街, 好耐都已經無出去行街街, 可能係因為近來星期六日嘅天氣都係好一般, 但困咗係屋企咁耐, 真係要出去抖吓氣, 本來約咗小朋友 11:30 am 係觀塘等, 但出咗門口無耐就收到佢電話, 話要遲啲先到, 無所謂啦, 咁我咪去調頸嶺接佢囉, 佢好少遲到架, 平時我去到地鐵站已經見佢係到架喇, 但今日佢遲咗少少, 見到佢嘅時候, 發現佢成身都係新架喎, 我都幾 likey. 哈哈, 其實我好簡單, 只要唔好著到奇奇怪怪咁我就 ok 架喇, 佢今日嘅斯文打扮, 正... 不過佢始終都係唔適合著啲斯文鞋, 前果幾次都因為著呢類鞋而搞到隻腳仔唔舒服, 見到佢行一步, 停兩步, 我都有唔高興, 其實我都唔係一個好體貼嘅男友, 唔係好懂得理人感受, 又易發脾氣, 有時會諗, 都咁大過人架啦, 點解成日買鞋都唔 arm 身架, 買嘅時候無試清楚架咩... 第時如果有細路仔, 咁你點照顧佢呢, 總之, 係果刻, 我滿腦子都係埋怨啦, 都無咩理過佢唔舒服, 但靜咗一陣諗真, 又唔可以怪佢, 好似我自己咁, 之前買果對鞋, 都買大咗, 唔 arm 啦, 講真, 試果陣, 真係好短時間, 跟本無可能試得好清楚.. 之後我又收拾心情同佢去買過一對鞋啦, 佢最後撰咗一對涼鞋, 粉紅色, 幾靚架, 哈哈, 之前發咗你一陣脾氣, 好啦, 送返對鞋仔比你補數.. 買完鞋之後, 更係去醫肚啦, 我地去咗和花亭食壽司, 最好味嘅就係天婦羅壽司.. 大大隻蝦, 又熱又脆, 正, 講真, 我覺得一個人好有錢都真係為無咩用, 最重要係有親人(小朋友, 我已經當咗你係我嘅親人架喇)係你身邊同你分享, 好似之前我自己買咗隻好大好大嘅蟹返屋企自己食, 都唔係覺得好開心.. 人係呢個世界, 最重要真係有親人囉, 可以同你一齊分享, 錢, 太多真係無咩用, 一句說話可能大家覺得好阿Q, 但我又真係好認同.. "幾有錢, 你都係瞓一張床, 用一個廁所, 食三餐", 無嘅時候, 你想有, 有咗之後又係不外如是... 哈哈, 講完我嘅偉論喇.. 講返餐晏先, 除咗蝦, 我地仲食咗啲 common 嘅嘢, 好似三文魚壽司同埋一啲手卷, 總括黎講, 佢比元氣真係好食好多, 但價錢又唔係貴好多喎, 仲要有個"特別折頭".. 呵呵, 真係第一次, 食飽飽, 就去咗我嘅天堂, toyrus.. 好耐無去喇, 仲見到有人 demo 直昇機, 我都有試玩, 小朋友見到我好鐘意, 就買咗隻比我, 嘩, 我有賺啦, 果隻嘢仲貴過對鞋加埋餐晏.. 多謝你... 我地又去咗睇 bb 用品, 嘩, 原來啲 BB 車, 可以過萬一架喎, 唔通真係勁舒服, 瞓咗會快大啲, 我同小朋友都覺得我地無錢買, 因為真係超 grand... 養個細路真係唔易, 除咗今錢, 仲要心力, 做人父母真偉大, 睇黎我真係要對佢地好啲, 最後我地去咗住好啲.. 哈哈... 我真係記得同你去過架.. 仲記得買咗啲咩 tim....

行完街街, 就去街市買餸, 都係啲簡單嘢, 家常便飯.. 返到屋企, 就更係一路睇戲一路食糖水啦.. 我就食飽飽, 不過小朋友就... 佢話我食曬佢嘅.. 搞到佢唔夠食, 呵.. 呢個故事教訓你, 有得食就好食喇... 唔係, 食曬就無架喇.. 為咗滿足佢, 飯後第一時間再整過比佢食.. 不過可能無之前頭淡湯咁好味, 都係滿足唔到佢.. 真慘.. 望見佢個樣真係幾搞笑...

大家好似發覺我講咁耐都同我個 topic "滿足現狀..." 無咩關係.. 其實, 我今日係好好好開心.. 全心全意咁出街, 食晏, 買嘢, 食糖水... 係一種好 warm 嘅感覺, 如果佢可以陪我到第二朝, 咁就 perfect 喇.. 可惜唔得... 我希望我有一個健康嘅身體, 一份穩定嘅工, 照顧佢.. 甘苦與共同, 神呀, 我搵到一個我愛嘅人, 希望祢會祝福我地.. 仲有, 我最近已經開始諗結婚嘅嘢喇.. 你比啲智慧我, 因為我唔係聰明嘅人, 擔心會搞得唔好, 令到任何人唔開心.....

正一仆街??

今朝一早就攞部手提電腦去整, 上到去發現環境好唔錯,同我舊公司一樣可以望到海, 以前舊機場未搬嘅時候仲可以睇到成條跑道, 得閒望吓啲飛機升降, 都幾開心, 而家都唔錯嘅, 係呢個豪宅區附近, 一啲唔係呢到返工嘅 friend, 都好羨慕我地, 但我就無咩特別感覺, 可能人永遠都係身在福中不知福掛, 講完環境, 講返正題, 話說有兩個 receptionist 係到傾計, 一個好似好激氣咁, 另外一個就係咁安撫佢, 最初我都唔知佢地講緊咩, 只係聽到唔開心果個係咁講, 24 號對我黎講無咩特別架, 我都只係留係屋企, 我以為佢對公司安排唔滿意, 要 ot, 心諗, 而家啲老板係咁架啦, 只怪你自己無本事啫, 但突然我聽到幾句說話令我恍然大悟, 就係呢幾句金句, "人地出面放煙花, 佢都覺得無咩特別, 基本上如果開心, 日日都一樣架啦"...嘩, 一講呢啲就知係投訴男友啦, 哈哈.. 跟住佢坐低咗又繼續講, "佢仲話呢日我更係要陪你架喎, 點去呀, 但個 friend 又生日, 成班 freind 一齊出去玩... 點好呢?... 扮 Q 曬嘢, 正一扑街..".跟住仲要咀 miu miu.. 真係難頂, 唉, 天下女人都係小氣架喇,過時過節唔陪佢地, 死罪...做男人真係慘, 成日都要扮矮仔, 認低威, 不過咁, 我地大人有大量, 做大事,唔同你地計較.. 呵呵..

老細今日又叫咗我埋位, 話上兩個月個 team 嘅 effort 用多咗, 叫我要好似財爺咁睇住盤數, 量入為出, 咁我話, 我地真係要咁多人做嘢架喎, 佢就話, 係時候我教吓你做人嘅道理.. 以前我係科大讀 finance 嘅時候, 個 lecturer 將 finance 比喻為劃畫, 你鍾意係呢到加多啲色就加多啲,邊到少啲, 就劃細力啲, 即係意味住我要睇餸食飯囉, 要醒啲, 比如叫佢放假, 或者將啲嘢 charge 落去公司嘅 overhead, 咁 project 就唔會見到洗大咗喇..總之唔好洗大過 project 嘅budget..諗真, 真係幾難, 又要人做嘢, 又要唔好報, 好似講大話咁... 佢最後仲要加多句, 你而家係 I8, 要諗呢啲嘢架喇.. 死未, 我漸漸開始覺得我真係做緊 management 嘢.. which is 我勁唔鐘意同無天份嘅, 點算...?

唯我獨享...

"不知所謂".. 呢句係小朋友嘅回禮金句.. 我真係想問, 我又有幾唔成熟, 唔負責任, 唔體諒人, 以前唔係咁講架喎, 係覺得我對佢好, 有主見, 可以保護到佢先一齊, 而家一嗌交, 先知道原來有好多唔滿意嘅地方, 我只係覺得你打橫黎講, 我係一個人黎嘅, 又唔係 boardband., 點可以比你 "唯我獨享", 人一定會有家人, 朋友, 自己嘅興趣, 問題係你任何時候, 都要人地放你係第一位, 試問我有幾可因為自己要去玩而掉低你..? 基本上, 我除咗係屋企玩 flightsim 之外, 已經無其他嘢玩, 因為出年要結婚, 原本好想學飛嘅都無學啦.. 咁叫唔成熟... 知你病, 去接你收工, 買嘢比你飲, 咁叫唔體諒你, 你無咗細果個, 我都已經好斬釘折鐵咁無同 B 小姐一齊, 都無再聯絡佢, 咁叫唔負責任, 玩一晚咁多嘅 flightsim 就叫做唔尊重, 一心二用, 仲要發我老皮, 呢個世界咩道理呀...? 我唔覺得今次我有錯喎, 點解次次都要我認低威...

咁晚比人激完, 仲要身體好唔舒服, 唔知係咪報應, 食咗隻大蟹, 成晚都瞓唔到, 好辛苦, 好似成身敏感咁, 又係咁咳, 但又有無人關心我呢..? 睇咗佢個 blog, 又係話我做男友做得幾唔稱職, 勁灰... 講真,我真係唔識做....

今日終於係公司搵到部 spare 嘅 notebook, 聽日可以攞自己部 notebook 去整, 唔知幾時有得攞返, 不過無所謂啦, 反正我都有第二部用住先, 而且聽講 IBM 都好有效率, 應該一兩日之後就有得攞返.. 不過因為過咗保養, 要比錢整, 又要我自己比住先, 之後先 claim 返, 一等又要等幾個月, 痴 Q 線.. 上次 claim 果一舊水的士錢, 等咗幾個月先 claim 到... 人做秘書, 你條老孤婆又做秘書, 問你咩嘢, 你都話話唔知 , 無呀, 咁你有咩用呀, 返屋企食屎啦... 真係見到你都把幾火...

係公司比人玩, 老細又比面色我睇, 自己條女又唔增氣, 老豆又覺得我無用, 身體又唔舒服, 又痕又鼻塞.... 幾十樣嘢加埋搞到我勁唔開心, 想出去搵嘢發洩吓....

無理取鬧...

頂你個肺, 都唔係第一次因為打電話而嗌交, 而家做咩事呢, 晏晝食 lunch 嘅時候已經講咗一次電話, 收工自動自覺又打多次, 上到巴士又傾咗一次, 返到屋企又再傾, 好似驚死我出去搞搞震, 終日都 check 住, 已經去到一個我反感嘅地步, 今晚因為補習仔唔得閒, 所以我藉機會唔返媽媽屋企食飯, 買咗自己最鐘意食嘅蟹, 返屋企自己煮, 一路食一路睇電視, 搞搞吓已經 9:30 pm, 之後諗住飛一轉 flight sim, 因為用正常速度, 所以都飛到過十一點, 都知道佢實會有怨言, 因為無論有無特別嘢都好,晚晚都要講電話, 所以都預早話佢知搞緊嘢, 會過多十五至二十分鐘再打比佢, 收線嘅時候都 feel 到佢唔高興, 之後到我最重要關頭降落嘅時候, 又收到電話, 好唔高興咁問搞緊咩, 咪話佢知要降落, 唔講住, 佢就發老皮, 話唔講, 瞓覺, 我都應承認話一陣間打比佢, 好喇, 玩完 flight sim, 打比佢, 聽得出佢唔開心, 佢都吋吋貢咁話, 一係開心, 一係唔開心, 有啲人搞到佢唔開心, 我真係好唔明, 點解做女友可以做到咁... 係唔能係我日日只係係到講電話, 咩能都唔做, 咁就最好, 都就黎三十架啦, 成熟啲好唔好, 做一個會為男友著想嘅女友啦, 唔好一日只係係到驚佢出去偷食, 三日唔埋兩日, 就因為打電話呢啲無聊嘢唔開心而嘈啦.. 唔該...
原本我今日好地地開開心心, 最後比人搞到無曬 mood, 一肚火, 仆街..

麻煩三八...

今朝撘巴士返工, 一上車坐咗係件豬扖隔離, 係我未坐低之前, 佢已經開始講電話, 內容來來去去都係講兩張唔見咗嘅支票, 驚比人模佢簽名攞錢, 果位銀行職員解釋話只要 void 咗兩張支票,咁就cash 唔到架喇, 人地話要收佢 $120 做手續費, 佢就講, 我地公司同你地關係咁好, 唔駛收咁多啦, 人地更係話唔得啦, 跟住又問人, 你收咗我嘅 $120, 有無收條架, 如果無, 我點知係你自己袋咗定真係銀行收咗呢, 人地咪答佢會寄返張 debit note 比佢囉, 大嬸, 你用吓腦啦, 你每個月都收到月結單, 扣咗你嘅 charges, 一定見到到架啦...之後仲係咁問人幾時會收到張 debit note... 最遲星期六..? 最遲星期六..?... 如是者講咗三次, 之後人地更正話唔係收 $120 只係收$60, 佢又問人點解咁得意嘅, 頭先話 $120 , 而家又改話收 $60, 又問如果唔係兩張, 係三張, 又收幾錢呢..? 真係人都癲...頂, 把死人聲好似佢個人咁大, 好鬼討厭, 講完啲 void 支票嘅嘢, 又問人地呀邊個邊個有無係佢戶口扣錢, 我心諗, 呢啲嘢唔係自己 check 架咩, 問咩 Q 嘢人呀... 諗諗吓, 佢都幾似我公司啲白痴 user, 狗屎垃圾都問一餐, 真係阻住個地球轉.. 哈, 唔講你唔知, 到我落車嘅時候, 果個 C9 都仲攞住個電話, 應該係聽指示, 不斷禁禁禁, , 唔知 check 啲咩 Q 嘢...

今日終於發覺我星期日做嘅 resource plan, 阿姐係無睇嘅, 因為今佢捉咗我同另外一個同事去 brainstorm 啲 resources, 但都無攞過我份 plan 出黎,真係超級 upset, 都唔知咁辛苦捱眼瞓做黎仲咩, 不過跟佢去 brainstorm 都真係學到嘢嘅, 佢嘅思路同諗嘢嘅速度都好值得我去學習, 睇黎個 project 都真係搞得成, 死啦, 由四月開始應該會好忙, 因為我地好大好大機會以 '天價' 接到呢個 project 返黎... 咁到時就會返灣仔, 年中無休.. 聽講 sales team 今日仲約咗個客啲高層出去食午飯, 去 grand hyatt 食西餐, 果然 '西人' 食西嘢, , 埋單要幾千蚊, 好貴喎, 認真 dum 本... 你地就好啦, 做少少嘢, 就可以分一個成千萬 project 嘅 commission.. 保守估計, 比 1% 你地都已經勁和味.. 我地班 devloper 就慘喇, 做足成年, 到出年都唔知有無 bonus.. shit...

不良紀錄..

今日食 lunch 嘅時候, 突然收到小朋友來電, 一開始就好唔高興咁問, 你有無收到我個 sms, 我話有, 跟住佢就話我, 點解唔覆佢個 sms, 我都唔知佢 send 咗個新嘅過黎, 以為佢講緊係之前reply 我果個sms, 我又好理直氣壯咁問佢點解要覆, 之後講咗一陣先知佢 send 咗個新嘅 sms 黎問有關於我早前 post 上blog 嘅約會問題.. 嘩, 你都真係幾敏感架喎, 咁日又好奇怪咁問我係唔係去咗食 sushi.. 我好似有講過我星期三唔駛補習, 唔返媽媽到食飯, 只係無話比佢知去咗 taste 買嘢食, 但其實佢都應該知道我嘅口味, 黎黎去去都係果幾到架啦...

話時話, 諗諗吓, 近來小朋友都幾多問題...

1) 星期五晚唔高興咁打比我, 之後知道我係媽媽屋企食飯先心情好返少少, 然後收線, 但後來先知原來佢唔滿意我無打電話比佢, 我真係唔明, 唔通次次都要打咁 routine..? 我已經晚晚都有打喇喎, 唔敢想像有一日如果唔係每晚都打比佢, 佢會點反應....

2) 星期日問我係唔係去咗食 sushi.. (上文己提到..)

3) 今日打黎問有關約會一事... (上一篇日記己提到..)

總之覺得而家呢一刻, 佢都係唔信我.. 真係好難受, 其實自問我已經好乖架喇, 除咗同佢出街, 真係邊到都無去架喇, 我仲可以點呢, 講得消極啲, 有時真係覺得自己好似個犯人咁, 點解會咁架呢, 唔通真係犯過一次錯就會永遠留低一個不良紀錄嘅..?

其實我真係好相信.. "人在做, 天在看".. 好似以前咁, 我覺得我嘅安排係天依無逢, 一定唔會比人發現去偷食, 但最後咪又係一次意外令到個大話穿煲... 其實我而家都已經明白到講大話係好辛苦嘅, 同一時間去應付兩個人仲大鑊.. 心理上都唔會好受.. 你而家再叫我試多次, 我都真係無興趣... 信唔信都好... 唔想再多解釋..

阿姐阿姐.. 真係叫你做大家姐, 星期五又話份 resource plan 星期一 9:00 am 要, 趕住聽日去開會, 搞到我咁晚做到三點半, 今日你又好似無咗件事, 唔通呢個世界啲老細真係好鐘意嚇吓人嘅...頂...

嘩, 今日係公司發現咗個小秘密, 原來之前唔知邊個 refer 入黎同我同 grade 嘅中坑, 原來好似真係好 senior 架喎, 上星期五跟埋班 vice president 上北京開會喎, 好得人驚... 佢好似上去 sell 我地 support 繄嘅 appliation, 睇黎呢個人真係唔簡單, 要小心小心.. 如果咁講, 佢咪仲高 grade 過我阿姐...呵呵... 有時係到諗, 自己 team 要升一個人, 要好 q 多 outstanding performace 做 support, 但你地啲自己友又可以要幾多入幾多, 仲要咩 grade 都得, 真係 till la ma... 一份工, 我而家都無以前咁緊張, 識多啲就做多啲, 扮傻仔, 啲嘢總有人幫你做...

無心之失??...

話說早兩日與某人有個約會, 但係差唔多個 function 開始之前先收到 call 佢黎唔到, 第一個反應係腦裡面一片空白, 因為最初諗住靠曬佢, 但突然間話黎唔到, 咁我點算好呢..? 比著平時都會陣腳大亂同唔開心, 但今次又無喎, 可能已經對佢地無咩期望.. 另外一個原因, 可能其實之前已經有第六感咁嘅事係會發生嘅.. 只係最終都係發生咗啫... 唉.... 好快我又收拾心情, 從新上路喇.. 最後都順利完成, 好彩...

前晚偷跳無返媽媽屋企食飯, 去咗 taste 買我最鐘意食嘅翡翠螺同埋刺身, 食完之後就玩我嘅至愛, flightsim.. 裝咗個靚靚香港場景, 個機場大樓又細緻咗好多喎, 又多咗啲拖車同小巴係個機場到, .. 勁得... 今次撰國泰真實嘅 flight schedule, 晚上 20:00 由台灣飛返香港, 降落大嘅係 22:45, 嘩.. 熄曬啲房燈, 自然後降落呢個香港國際機場, 望到著咗燈嘅青馬大橋, 同埋條好光嘅機場跑道.. 勁靚, 落到之後去到停機坪仲有啲拖車嘅車頂啲燈閃吓閃吓, 好鬼正.. 今次又 dub 咗個 video.. 不過都係個 filesize 太大, 有成三百幾 meg.. 放唔到上去 youtube 住.. 等遲啲得閒整細佢, 比大家欣賞... yeah... 仲有玩開 flight sim .. 先發覺有好多問題想問... 有一個叫 chilau 嘅後生仔, 啱啱係港龍完成咗個 cadet pilot training.. 佢一路都有細 blog 去分享佢係澳洲 training 嘅所見所聞.. 近來仲加多咗個 technical forum 去解答啲有關 aviation 嘅問題, 呵呵. 我可以去 send 去問吓佢, 不過唔知係我電腦問題定係佢個 forum 嘅 server 有問題, post 唔到新嘅問題噃.... 搵日得閒, 用公司個腦試吓先...

做架兩...

今朝係小巴瞓得好地地.. 好夢正濃嘅時候, 迷迷糊糊咁比把男人聲嘈醒, 佢係咁同個司機講, "係第二期有落呀, 我第一次黎唔識路..". 如是者講咗三次, 但個司機都係無理佢, 只係去到果個男人嘅目的地, 就停低架車, 又唔話比人知到喇, 要落車, 其實個男人都已經超級有禮貌, 問咗佢好多次, 又講到明自己係唔識路, 但佢都無理到, 人地落車嘅時候仲要吋人話人地唔識按鍾架咩.. 我心諗, 你係咪弱智定係聾架, 人地都講咗好多次唔識路啦, 點按鐘, 識嘅就唔駛問你條粉皮, 比你玩啦.. 我都真係好唔明, andy lau 日日都係電視到講, 叫你地班服務性行業嘅人有禮貌啲, 但都係都無咩改善.. 係呢到真係要同呢個哥仔講句, "今時今日咁嘅服務態度唔夠架.." 應該係點... "先生, 前面過少少就係第二期喇, 到咗我嗌你落車啦.." 本來好抱不平嘅我, 落車嘅時候想吋 Q 佢, 不過諗諗下, 做人都係唔好強出頭.. 蝕底嘅會係自己.. 係咪..?

今日返到公司, 又發覺有同事要請病假, 睇黎呢排啲細菌真係好勁喎, 日日都有人病.. 係街都見到好多人咳..好驚 SARS 再現. 到時又要做蒙面超人, 家陣唔同以前, 我見得光, 唔駛帶 mask 出街架喎..唔知點解呢排總係覺得遲啲香港會有好嚴重嘅流感, 個股市會 bla bla 聲咁跌.. 唔通呢啲叫第六感..? 希望我嘅感覺係錯架啦..

今日又上普通話, 我都仲係傻吓傻吓咁唔多識講, 睇黎我地嘅家族都係無咩語言天份, 家姐讀咗幾次都係唔合格, 而原本滿有信心嘅我, 而家都無曬信心, 總之唔好咁貪心, 撰個初級班算啦, 而家都唔知點收科.. 聽講話唔合格要自己比錢, 死火...不過我又真係覺得教 "煲冬瓜" 幾好搵, 我地個 miss 只係坐係到講兩嘢就有錢收, 幾鬼舒服...

雖然今日都仲係有少少咳, 但都係忍唔住要食 macdonald. 因為好似就算我唔食熱氣嘢, 都無咩進展, 所以一於以毒玫毒.. 可能負負得正呢... 哈哈.. 不過係放工之後我已經無流鼻水, 好似好番好多, 只係喉嚨有少少痰.. 希望快啲好番啦.. 唔想成日都病.. 好慘...

無咗 vee vee 聲...

今日又再去睇醫生, 因為啲感冒仲未清曬, 呵呵, 醫生話今次我個肺無 vee vee 聲,好靚仔, 但係個喉嚨仲係好腫, 一邊鼻都仲係好紅, 佢話要開啲再勁啲嘅 antibiotics 比我, 又叫我好番之後去打呢個流感針, 因為我好似好易犯呢啲小人, 原本想叫佢再幫我量吓血壓, 但後來都無, 因為好驚再度都係高,我呢啲係咪叫做斬腳趾避沙蟲呢... 人就係咁架啦, 永遠唔想知道壞消息嘅..

小朋友呀, 幾時先會收到你嘅好消息呢..? 你日日都話就得, 但係都係得個講字, 唔好點我喎, 正所謂, 我金錢上, 心理上, 生理上, 都未做好準則架喎.. 我呢排心血少, 你唔好再嚇我, 如果唔係, 我實瓜得, 知無..?

今日終於打完其中一份 training material, 仲有好多份要打, 阿姐已經好唔耐煩咁問幾時先做完, 嘩, 又要打, 又要做 test case, 你估我真係超人咩, 話變出黎就變出黎咩, 我已經好勤力架喇, 比啲時間我啦, 佢今日又比咗樣新嘢我, 做咩 resource planning, 聽落都已經 hour 曬頭, 我從來都未做過, 而且 planning 係我最弱嘅一環, 死未, 仲要今個星期尾交, 點算, 升咗職之後, 啲嘢好似全部唔識做, 點算好, 慘喇, 就黎比人炒魷魚... 仲要無啦啦有兩個 fresh graduate 要 interview.. 之後要填返啲 form.. 呢樣先至係我最憎嘅, 以前去比人 interview 嘅時候, 覺得啲 manager interview 人好鬼過癮, 而家自己去 interview 人先發覺好鬼麻煩, 又要問佢地嘢,又要聽佢答, 遇到啲靚仔/女 fresh grad.. 就更係好啦, 遇到啲無厘頭嘅, 都要應酬佢地, 雖然好想一腳伸佢地出門口, 但又唔可以, 仲要係咁易都要講一陣間, 最慘係遇到啲好唔醒目, 明知自己 in 得差, 無機會嘅, 問佢仲有無問題, 佢地仲要懶有求知慾咁, 係咁問....頂... 今日 in 果個猛咁吹話自己幾想入黎我地間公司, 我地又大又有前途, 我心諗我地間公司都唔知害死咗幾多股民啦, 仲有六年都無加過人工喇喎, 比起果啲年年都坐定粒六有 point 跳, 有人工加嘅政府工, 我地真係, 慘, 慘, 慘.... 後生仔, 你吹都吹得唔好咁大啦, 可惜我今日無咩心情同你玩, 如果係平時我真係會問你.. "你點解覺得我地間公司好有前途呢, 我地嘅股價由五合一前嘅二十幾蚊跌到而家五蚊唔夠..." 不過.. 有個同事講過我地公司有三大優點, 我就好同意...

1. 人夠多, 邊到要人, 即刻可以派對軍隊落去.
2. 蝕得起, 你聽過請個賓賓做嘢, 佢會掉返轉頭比錢你洗未呢... ?
3. 都係最重要嘅一個 point.. 就係我地蝕極都唔會執...佩服...佩服...

慘啦, 今個禮拜又可能去唔到補習喇, 再係咁落去, 真係遲早比人 out.. 今次又係拜啲"未來好同事"所賜... 點解係要撰 after office hour 黎 interview, 仲要特登出去"老銅"見佢地.. 真係未見過有公司咁 cheap.. 好心啦, 有心搵工嘅, 落少少本, 攞番日假啦, 如果我話得事嘅, 呢啲咁嘅 pk 一定無得 in... 不過阿姐話齋, 我地又比唔起錢, 又要請啲有經驗, 真係好難架喇.. 我覺得我地做唔成 IT solution 公司, 都可以做補習社, 因為年中都 train 咗唔少人, 仲要唔駛 undertake, 係咁比人地去上 course.. 犀利....

今日返到公司又check 吓我個 flight report 驗證咗未, 終於成功喇,呢次簡直就係我係模擬航空界踏出嘅一大步, 跟住落黎首先要由台灣飛返香港, 之後再飛一次日本, 咁就可以開始玩另外一架 pro 啲嘅 747 喇.. 話時話如果玩過好玩, 真係要買番個正版, 尊重知識版權嘛, 係咪.. 我都有啲 "公德心" 架....

講開 "公德心", 小朋友之前話估唔到我係一個咁無公德心嘅人, 掉嘢落街, 話時話, 我都只係掉廁紙啫, 有咩咁大件事, 我有交管理費架喎, 佢地掃地都應該啦, 唔係我, 佢地無工開 tim 啦.. 應該多謝我, 呵呵.. 呢件事令我諗起細個有一次落雨嘅時候, 我請下面啲街坊 "飲熱生啤" 點知比樓下個死八婆見到, 仲向我老豆投訴, 搞到我無得去游水之餘, 仲要比佢打鑊金... 我呢世都記得佢....呢個世界真係好多無聊人, 鐘意玩投訴, 係要搞到人地啲仔女比人鬧先至開心嘅... 呢啲就係食鉋無憂米嘅 C9....

一日三餐...

每個人嘅生活方式同習慣都唔同, 有啲人鐘意正正常常, 一日食三餐, 分早午晚, 有啲人就好似我咁, 早午餐一齊食, 早午餐, 因為肚餓, 所以食得快啲, 至於晚餐, 因為之前已經食飽咗, 所以就可以食慢少少, 但咁又唔可以代表唔需要食喎...但小朋友因為我想食完再食, 又依得慢而唔高興, 我都唔明, 你以前食得慢, 我都無 complain 啦, 但而家到我, 你又唔高興... 仲有喎, 呢排我病, 係咁上下啦.. 都唔知投訴啲咩... 頂...

講完唔開心嘅嘢.. 又無事喇.. 你問我點解咁快又可以無事, 我都唔知點答你, 總之而家嘅我, 只係想開開心心, 無謂為啲芝麻綠豆嘅事而影響感情.. 家和萬事興, 家衰口不停, 係咪...? 嘅然你想我改吓我嘅生活習慣, 我咪又改吓囉, its not a big deal...

大快活嘅炸雞脾, 只係一般啫, 咸咗少少, 只於杯紅豆冰, 就 ok 啦.. 一個簡單嘅茶餐, 都食得好開心, 咁日又整咗我最拿手嘅蒜容豆豉蒸石班, 幾好味, 可惜有少少唔熟, 要番蒸, 有少許失敗... 話時話, 咁日好似係新年之後第一次開爐, 小朋友我有無記錯呀...?

係 user 嘅口中, 知道舊情人會同尊貴嘅客戶去日本, 記得以前佢成日都話要去旅行, 但因為種種原因, 我都無同佢去到, 希望佢今次玩得開開心心啦, 至於我可以做嘅, 就係盡量去 coordinate 我嘅 staff 幫尊貴嘅客戶去完成手頭上嘅工作, 等佢唔駛比老細 band 放假, 影響原來嘅行程... 係啲到, 我要特別多謝六月小姐, 係病嘅時候, 仲要幫我做嘢, 真係辛苦你, 希望你係不久嘅將來見到回報, 話時話, 我都幾好彩, 有啲幫到自己嘅 staff, 係而家呢間公司唯一嘅好處, 就係同事之間相處好開心囉, 呢個都係其中一個我繼續留低嘅原因... 至於死靚仔, 呢排都乖咗好多喇, 比心機啦, 我都想你有一日升職請我食飯...

原來我最近睇漏咗小朋友之前一篇日記喎, 咁晚先睇到... 篇嘢都幾重要架喎, 佢 "投訴" 我係屋企大覺瞓, 要佢自己係寒風中孤單回家... 真係唔好意思喎.. 呵呵, 又係你自己話我婆婆媽媽, 唔駛送嘅, 原來口不對心... 明白了, 下次識點做喇...

電子聽筒..

己經有好幾日無寫日記喇, 小朋友話我只係三分鐘熱度, 實際都唔係呀, 只係我早幾日真係病得好辛苦, 直至今日都仲流緊鼻涕, 但好奇怪架喎, 瞓緊覺就無事, 好地地, 一起身就唔舒服, 點解呀, 我從來都未試過病咁耐架喎, 唔通後天免疫力失衡..?? 話時話, 都睇咗三個公司 panel 醫生, 但真係一啲起色都無, 正所謂, panel 睇你唔死, 都病你一世, 以下係其中一個 panel 醫生睇我嘅過程...

D: 今日仲咩事
P: 咳到 nut 肺, 已經睇第三個醫生..
D: la 高件衫... 唔過三秒, 基本上個聽筒都未掂到個身... 已經聽完...
D: ma 大口.. 支雪條棍都未掂到脷面... 又搞掂....
D: 啲痰咩色...
P: 之前綠色, 食完 antibiotics, 而家無色... 一路答佢, 一路 yau 褲...
D: 簽名.. 等得唔耐煩.. 再叫, 簽名...
P: 簽完個名.....
D: 得架喻...
P:.... 好懷疑, 佢係心諗, 簽完個名, 有錢收, 所以得呢, 定係睇完我, 知我應該無咩大問題, 所以話得呢...., 到呢一刻, 都無話我知我係咩事, 天呀....

所以話呢, 啲保險經紀成日話買份醫療保險, 有事可以睇醫生, 我就真係唔多信... 呢個世界邊有免費午餐架... 係香港要搵一個可靠嘅醫生真係好難.. 我到而家都未搵到....

終於要自己攞錢出黎睇私家醫生... 佢都 ok, 問得好詳細, 不過量到血壓好似有少少高, 雖然佢話度一次係唔可以作準, 要過多幾日再度, 度三次, 如果三次都高, 先再 follow up... 但都真係好驚.. 血壓高即係意味住我嘅飛行夢想會完結... 好 down... 希望唔好有事.... 我真係受唔住架.... 不過今日睇醫生先知原來而家已經有電子聽筒, 醫生話好好用, 可以將啲聲放大十陪, 唔通聽得清楚啲, 所以佢聽到我個肺有少少 vee vee 聲.. 不過佢話好 minor.. 可能係今次感冒, 所以咁樣, 我又唔食煙, 應該無暗病, 唔駛驚....

前妻今朝又打黎, 唔知點解, 而家聽到佢電話, 覺得好困擾... 次次打黎都係搵人聽佢"抱不平", 今次又因為租屋嘅問題同人嘈, 打黎只係想我話佢啱... 我只係講咗句, "咁即係輸打贏要啫".. 咁就激怒咗佢, 佢回番句, "咁又係, 可能你大方, 大把錢, 唔志在... 我唔係架, 我無錢, 好啦, 無嘢喇, 唔講喇, bye bye'... 嘩...終於收線, 幾鬼開心... 唉, 妳都結咗婚啦, 有咩應該搵妳老公講, 搵我做咩呢, 我叫妳搞嘅嘢, 妳又無件事, 成日都拖住我, 究竟想點呢...? 都係老豆講得啱, 無咩就唔好同佢講咁多喇.. 話曬人地都係有夫之婦, 小心啲好...

咳到 nut 肺...

人地話, 財多先身子弱...但點解我呢排咁鬼窮, 身子都咁差架呢, 由上個星期咳到而家, 情況越黎越嚴重, 黎咗兩個醫生, 都未見有咩起色, 今日仲好似嚴重咗, 一起身就覺得好 dizzy.. 唔通感冒菌已經上咗腦..? 真係好驚... 因為感冒, 已經有幾日無寫blog, 今日要 update 吓佢先得...

我終於成功降落呢個台北桃榞機場, 仲錄咗條片 tim, 遲啲就可以放上黎個 blog 到比大家欣賞, flight sim 呢個 hobbies 又真係幾好, 唔駛洗錢之餘, 又可以學到嘢, 啱曬我呢啲財政緊絀嘅人.. 話時話, 我都花咗好多時間先成功降落到, 仲冷落咗朋友仔一陣間, 又要佢幫我拖地打掃, 真係唔好意思... 錫返您先...

今日, "又要做狗, 又要做馬"... 差啲頂唔順, 不過, 最緊要係小朋友開心, 我都樂此不疲... 最勁係我地破咗紀錄, 將唔可能變成有可能嘛, 我都不得不讚吓我自己同佢.. 勁勁勁...

666 大家就知係凶兆, 唔好意頭, 咁大家又估唔估到, 777 又係咩呢? 哈哈, 就係今日股市嘅跌幅, 朋友仔問我仲咩跌咁多都仲咁開心, 唔似我嗁性格, 佢話平時嘅我, 應該已經大發脾氣架喎, 點解今次咁冷靜? 我都唔知喎, 可能傷心過度掛, 哈哈... 既然人人都係咁講話個股市好高, 想佢跌吓, 咁而家佢終於都跌喇, 咁咪應該拍手掌囉.. 正如我一返到屋企, 已經即刻比老豆吋啦, 話早排我係咁叫買中銀, 今日跌破 $18 蚊喇, 我跟住更係吋返佢啦, "點呀, 跌到落 $18 蚊, 你買呀..?" 佢即刻無聲出啦.. 事實嘛, 佢地呢啲, 正所謂, 高又驚佢跌番落黎, 低又驚佢再跌, 永遠都唔會買嘅...

股市起落, 正常啦, 我又唔係要賣, 咪放埋佢囉, 總會升番嘅, 我諗我買嘅都唔無垃圾股掛, 係咪...? 況且, 大把人損失慘重過我啦, 哈哈, 唔知有無傻仔 $28 買人壽呢, 如果有, 就要講句 "congratulations" 喇, 哈哈...

聯歡晚會..

一年一度嘅公司春茗又係呢個會展舉行, 我上年無去到, 確實嘅原因唔記得, 大概係唔滿意要比錢啦, 今年又再搞, 都無直口唔去啦, 話時話有咩理由春茗要員工比錢架? 不過, 學老豆話時齋, 公司搞嘅小圈子 function, 都一定要比面嘅, 就當比一舊水做善事囉.. 今次就由四方面去形容吓呢個 function 啦...

場地: 座落係灣仔會展, 正係聽個名都已經知道好嘢啦, 可惜, 我地 team 座走廊, 只可以靠大銀幕睇會場裡面嘅情況..張枱附近嘅燈光好鬼暗, 唔知有無食咗小強....

食物: 點講好呢, 應該係咁多次去食酒席, 最少味餸嘅一次, 總共有六個餸, 有味 "鮑魚汁會黑豆皮雞", 味道怪怪, 應該叫做怪味雞, 啲魚翅, 勁, 用我從來無見過酒席會用嘅"超,超,超大碗"去哉, 勁搞笑, 我覺得同 "老銅" 嘅差唔多.. 好有水準, 嘩, 死啦, 我要節儉啲先得, 原來我平時屋企寫得勁豪...冬至果餐仲好餸過今次.. 一舊水, 自己食 suchi 唔知會唔會飽過今次呢...?

表演: 嘩, 嘩, 嘩.. 呢個真係唔係講笑, 我地請咗熱爆全城嘅陳x靈黎勁歌熱舞, 係我果個年代佢簡直瘋魔萬千歌迷, 佢又跳又唱, 非常落力, 最犀利係果首 "今晚夜"

* 同聚暢飲今晚夜　莫理今宵星稀月也斜尋樂趁萬花嬌俏　
知否明天一過花不會謝同樂碰杯今晚夜　
就趁美酒芬芳香四射能盡興就開心笑　
知否明天一到花亦會謝緣份到展開歡顏　
省得過後怨嗟　謀共醉拋開心事快樂能借得且去賒　
同渡這一晚夜　願你此刻珍惜今晚夜陪伴你讓心花放　
知否明天一到花亦會謝喜*

Repeat *我願同PxxW 過每一個日與夜
^^^^^^^^^^^^^^^^^^^^^^^^^^ 呢句真係正到爆....好頂癮... 最後連啲高層都企埋上凳到同佢一齊跳... 幾好氣氛....

最精彩嘅一幕當然係老霍幫陳x靈除衫啦, 睇到我熱辣辣... 陳小姐仲話霍幫主好熟手.. 犀利過好多後生仔.. 真係不愧貴為我地老大..

抽獎.. 三千幾人, 有五十五份獎品, 計落都真係"好很多", 我呢啲就一定無份啦, 不過抽到都未必一定係好嘢... 有一份獎品係, 'American Express coin bag and name card holder'.. 真係玩嘢, 呢啲都算係獎品, 我是但攞張 credit card 嘅迎新禮品都好過佢啦, 仆街... 不過, 我都抽到自己果枱至大嘅 table price.. 係聖安娜嘅精美 cookie.. 都幾好咁啦...

總括黎講.. 可以用周中師傅形容啲餸相似嘅語調 "好過飲滾水咁啦" 咁, .. 黎形容呢個 function, "好過閒在家中無女溝咁啦"...