只談公事, 不談私事...

喂喂.. 新年又到喇, 為咗答謝你班仆街今年嘅努力, 我地一於搞個春茗, 人人有份 (fall 水), 永不落空, Hm.. 可能細佬中文唔好, 唔明咩係"春茗", 仔仔你明唔明呀? "春茗" 嘅定義係班高層眼中係..., 呵呵, "recognize" 你班杏加橙.. 過去果年做得好能辛苦, 所以 "慰勞" 你.. 咁我地咪係 "2009 "慰安仔/女"? ..要自己比錢仲耍陪笑..... 好似同原意有 contradiction wor...唉, 咩世界...

呢個 blog.. 2009 年大革新, 只談公事, 不談私事

學識做人...

貧不與富鬥, 富不與官爭...

只做我應做, 照足指引做...

別人來問我, 無須付責任...

做人好僵化, 事實應如此...

嫁女.. 賣女..

係佢屋企一家人食飯嘅次數仲多過係我屋企,始從 mo 仔出咗世之後, 十隻手指都數得曬上去食過幾多次飯, 每個星期六或日, 一休息都係上去佢果到.. 咁樣叫做賣女, 我唯一認同嘅係, 我父母見 mo mo　嘅時間多過佢地好多，因為係佢地湊...咁又有問題? 可能我大男人, 要求自己老婆 "做每件事之前, 諗吓點樣另自己係人地面前有面子" 嘅諗法係唔啱掛..講完呢次之後, 唔會再講, 因為明白大家嘅諗法唔同, 講多都無謂..

嗌交...

唔知點解, 近來常常同小朋友嗌交, 因為咩原因我自己都唔知, 可能覺得佢咩都只係緊張 momo, 而我呢, 己經忘記咗喇, 我好注重啲傳統嘅節日, 但點解係都要搞到好遲先上去我屋企, 上次爸爸生日又係咁, 咁日做冬又係咁, 起初我都無咩所謂, 但打到電話返屋企, 一個又問點解咁遲, 另外一個又問, 我都即刻好唔開心, 有時我諗, 做人老婆, 點解咩都唔識為老公打算,一年三百六十五日都係為仔仔.. 我都係你老公黎架喎, 有無理我感受架, 去護協, 一包二包, 都係買比 momo.. 我呢? 咁日行過 mannings.. 望見啲 nuts.. 諗起以往.... 不禁心裡一沈.. 夜晚瞓覺, 無啦啦將我啲吉, 掉去第二度, 好阻你咩, 大吉大利, 係咪放小小屋企嘢都唔得呀.. 呢頭話多飯, 我本來唔食飯嘅, 好心幫佢食啲, 又吋吋共..問我仲咩唔開心, 換轉你自己都唔開心啦.. 問我幾時結婚, 話唔記得, 自己都唔開心啦.. 我呢, 有無諗過我開唔開心呀... 一星期返五日工, 日日都要受氣, 擔驚受怕, 返到屋企咩.. 又係咁.. 超...

工作..

呢排真係好大壓力, 咁日返工, 由朝頭早一路寫 apprasial 寫到五點幾, 問心講, 就算寫我自己果份都未有咁好心機啦,有時我會問自己其實我對佢地係咪太好呢? 定係只係自己覺得自己好, 而人地唔多覺呢, 最終, 十個人有五個我比咗 MR2, 原本某人我都想比 MR2 嘅, 但諗咗好耐, 我都寫唔到佢有幾 outstanding, 可能我老細有佢道理, 一個做得嘢嘅 staff, 你一定會有嘢寫去 justify, 如果連你自己都諗唔到, 咁真係要認真咁諗吓佢係咪真係咁 outstanding.. 諗真啲, 有時佢又遲到, 叫佢做嘢咩, 又唔 Q 理你, 仲要有時睇佢面色, till la ma.. 上次weekend call 佢, 唔聽我電話, 仲要有時發啲 user 脾氣, 諗到呢到, 即刻降咗佢一個 grade. 最後唔駛寫 justification. 呵呵...今日我已經係 holiday mood, 準備下星期嘅 christmas.. 仔仔有 present, 媽媽好錫你, 你要聽話, 知無..?
呢啲客, 係咁叫你去開會, 比個 quote 佢,tum 你話老板無問題, 到 contract send 到過去啦, 就耍你, 話老板唔知幾時會簽..唔逼得, 好, 無所謂, 我咪又"回敬"返你, 你唔簽, 我又唔會答你問題架喎...慢慢玩囉, 反正搵多幾十萬又唔係分比我, 用不著咁 Q 緊張.. 係咪先..? 阿姐走咗之後, 我見咗好多人同鬼, 明白到要生存, 就唔好咁正直, 同埋要吹得吓, 做唔做到嘢咩, 真係唔係好重要.. 知無..?
呵呵, 賣咗我隻 272, 搵咗 $6000 蚊, 而家呢個環境, keep 住啲 cash 好啲, 遲啲買中石油, stable 啲, 272, 好似好大 risk.. 或者遲啲又趺返落黎, 我又坐船仔.. 個 account 多啲 cash, 個人有多啲安全感, 話曬而家有大有細, 自己唔食, 佢都要食, 係咪先..?

改變...

唔講你唔知, 其實我係一個好自私嘅人, 以前同舊愛食飯, 我好唔鐘意佢無啦啦叉隻筷子落我碟餸到 "偷" 我啲嘢食, 感覺好似有人搶走我嘅嘢一樣, 我會即刻發火, 但而家同小朋友出街食嘢, 好多時都會 share 架喎, 我又好歡喜, 點解? 我都真係唔知...難道呢啲叫做"愛"?

開心的一天..

咁日同小朋友去街街, 又影相, 食燒魷魚,跟住仲去試咗我恨咗好耐嘅 "王鮮" 煲仔飯 tim.. 超好味, 仲飲咗個凍 0 樂. 正正正... 不過小朋友果個山足牛肉飯, 味道好一般, 仲要食完先知比人搵丁, 加咗錢, 忡要少咗個做餸, 出咗門口, 小朋友講起先發覺, 頂..

星期六, 終於買咗個 DSLR Cam 喇, 仲可以當係 DV, 雖然只係得 30 fps, 比起果啲好 pro 嘅 dv 質素有距離, 但效果都 ok 喎, 一機兩用, 好方便, 聽小朋友講, 曬出黎果啲相都幾靚... 今晚返去要睇吓.. 我又問咗同事點解影夜景差咗少少, 佢地講咗啲 tips 比我聽, 下次試吓...

學飛, 睇黎係我有生之年都無可能實現到, 一加加幾十個 %, 都 chi q sin.. $2700 一個鐘, 點頂.. 以前都有直口比自己, 飛唔係只係有錢人嘅玩意, 而家連我自己都不得不承認呢個高尚嘅 "運動" 只適合啲有錢佬, 我地呢啲 "蟻民", 只可望門輕嘆...

我嘅夢想...

一路都無人知點解我想學飛.. 今次要講吓呢個秘密,我想有日可以揸飛機免費載啲有病嘅小朋友上天空睇風景, 等佢地可以係另一個角度睇呢個世界, 對生命有另一種體會, 其次係可以影一啲風景相, 搵外快, 因為係香港應該無咩人又識揸飛機,又識影相, 係好 prod 果種喎, 不過呢樣比較難,因為要有 commercial pilot 牌先可以收人地錢...攞個牌要近百萬, 好似無咩可能...除非我中六合彩.. 呵呵..

食早餐.. 睇蘋果..

一早返黎, 又收到"爛屎"姐姐電話,內容係 "你後面個同事仲係到睇緊蘋果, 食緊早餐", 點解呢個世界嘅人咁得閒, 成日走去做 police 架呢? 一啲無建樹嘅人, 實牙實齒話炒,但到最後居然係轉去第二個 team, 得閒無嘢做, 走黎搞我個 team, 又係我地問題, 真係 chi q sin..越做越唔開心, 而家無咩生意喇,就好似打落水狗咁,成 Q 日吋吋共, yiu la ma..一句講曬, 好 Q 唔開心,成日都要睇人面色, 頂..

又過一關...

終於又搞掂咗個死人exam.. 讀到真係想死,又大壓力, 如果 fail, 江青姐姐一定會清算我, 今次為自己又好, 為啖氣又好..都一定要合格, 仲有, 諗起佢果句, Thomas 咁好人, 就算佢死, 佢都會借啲人比你, 真係到而家都好唔開心, 覺得好 hurt, 一啲面都唔會比你, 唔好諗住個個都係你肚裡面條虫, 點知你想點先得架, 一時一樣,頂. 好彩, 最後都成功, 呢次考試其實有另外一個意義, 就係 show 比啲小朋友睇, 老細要我做嘅嘢我一定做到, 仲要係好短時間到達標, 吹咩..佢地都有同我講 congradulations. 我都好開心, 不過請食飯就無謂喇, 唔想太揚..話曬我都只係盡咗一個員工嘅本份, 無咩特別.. 有咗呢張cert, 我可以好 pround 咁話比人知我係一個 project manager 喇, 係一個肯定.. 我老細都有放張 cert 係枱面, 可想而之, 呢個 title 幾勁..黎緊我真係想讀 law.. 因為唔想再做 IT 比人睇唔起..要搵多啲錢, 等老婆同仔仔生活有保障...努力..

力不從心...

最近無咩"幹勁",可能係壓力太大,連瞓覺都瞓得唔好, 做其他嘢又點會有精神呢, 更可況係啲好需要體力勞動嘅活動,其實呢個問題已經發生咗好幾年,時好時壞, 但同人係無關係嘅, 小朋友, 我好認真咁同你講,我最愛果個一定係你啦...你知嗎? 近來可能已經習慣咗 mo 仔嘅喊聲,同埋不得不承認佢係受軟唔受硬嘅, 所以都費時發佢脾氣, 當我地嘅 EQ 高咗, 佢又真係好似易啲 control, 最重要嘅係, 睇真啲, 佢又真係幾鬼可愛, 得人錫.. 唔怪得個個當佢金坡蘿...

唔知為咩..

一日有大約 8 個鐘係公司,4.5 個鐘係屋企, 7.5 個鐘瞓覺,其餘時時間就係搭車, 食 lunch, hor si, 或者係做啲無聊嘢, 但篇篇係呢啲最無聊嘅時間最開心, 其餘時間都係瞓得唔好, 同埋好唔開心.. 咁嘅人生為咩呢?

入職面試

早兩日同幾個啱啱畢業嘅小朋友做咗個入職面試, 最後請咗三個, 今朝就比老細召咗埋位, 問我另外一個同事想要邊個, 又叫我簡單咁介紹吓佢地, 老實講, 果日見咗好多個人, 我都已經無咩印象喇, 之後我阿姐就補充佢 final interview 嘅睇法, 話唔太鐘意佢地, 點解呢? 第一個, 佢話一入去, 見佢腳 un un, 無咩禮貌, 第二個, 又話佢 “太老實”, 人地問佢點解轉工, 佢話比人知, 之前份工, interview 嘅時侯話比佢知會做 software, 點知去到好唔同, 做啲 hardware 嘅嘢, 所以佢就轉工, 阿姐話佢唔需要去講呢啲嘢, 無 value added, 老實講, 我一見佢地嘅 cv 都已經唔想 in, 啲成績好唔掂, 仲有, 果啲到而家都搵唔到工嘅小朋友, 我相信好極都有限, 但唔該你又諗吓貴公司又有幾好呢.., 好嘅人, 都唔申請啦, 講真, 好耐無見過啲似樣嘅 cv 喇,.. 唉, 跟住呢個老細, 好有壓力, 返工嘅日子, 朝朝未天光都已經驚醒… 有時真係驚, 搵到錢都無命享, , 之前交阿叔寫果份 report 比佢打返轉頭, 又要我執手尾 , 結果我咪成份寫過, 早兩日交咗比佢, 佢睇完都 ok, 問我係咪寫過曬, 我心諗, 當然啦, 佢仲話咁咪幾好, 寫得清清楚楚, 終於又輕鬆返口氣, 而家真係做日和尚, how 日經, 真係唔知佢幾時會唔滿意我, 整走我, 即使係阿叔呢啲有後枱嘅, 唔啱佢心水, 都無得留低…好驚, 好驚, 小心女人 ..

學習忍耐..

今朝小朋友打比我, 話 mo 仔好鬼百厭, 飲完奶, 周圍 yuk, 又逗人講嘢, 最終搞到嘔返曬啲奶出黎, 喂得咁辛苦, 到頭來都係得個吉, 但小朋友把聲, 一啲都無發脾氣, 如果掉轉係我, 我真係會發曬癲, 生 mo 仔之前, 都好擔心小朋友會唔多照顧佢, 但而家發覺佢真係好好, 好有心機, 而我, 就無咩耐性, 我將 mo mo 將相放咗係我公司枱頭, 佢真係好鬼得意, 成日都令我由心到笑出黎, 要好好學習忍耐, 揍大 mo 仔, 佢係上天賜比我地嘅禮物, 要好好珍惜, 細個爸媽都好錫我, 我都要好錫 mo 仔, 唔好再發脾氣喇 , 大朋友…

唔鐘意 mo 仔...

我自己都唔知點解會發脾氣, 果一刻真係控制唔到自己, 之後又會後悔, 睇咗小朋友嘅 blog, 都覺得佢講得好啱, 我真係無咩同 mo 仔玩, 一有時間, 就會去玩 flight sim.. 可能我未習慣有咗小朋友嘅生活, 覺得一放假同收工, 就做一啲好 routine 嘅嘢, 所以好易發老脾, 有時覺得自己都係一個好自私嘅人, 常樣樣嘢都無問題, 唔駛煩, 但世事又點會咁順利呢, 做人老豆, 真係有排學... 死未..? 無諗好耐嘅嘢, 今日又係腦海浮現, 之前申請咗移民, 批咗, 但係又無去, 而家 mo 仔出咗世, 眼見啲名校, 千幾人先爭幾個位, 讀果啲垃圾學校, 又驚阿仔學壞,所以移民嘅念頭又返黎喇, 今日上去移民局個 site 睇過, 應該都夠分, 但如果真係走, 小朋友過到去做咩呢, 佢可能好唔習慣, 至於自己, 又好唔舍得屋企人, 如果我地走,佢地一定好唔開心, 而家見少一日 mo 仔 都話掛住... 但香港只會越黎越差, 我地嘅祖國,日日新鮮, 日日甘, 今日毒奶粉, 聽日又唔知有咩新嘢, 成街都係啲大陸 lay.. 正一仆街,個個落黎攞褔利, 我地就好似幫人養仔, 好唔公平.. 香港, 你琉完架喇.. 人地十億, 慢慢同化你,死未...

好想去旅行..

唔知點解, 覺得好疲倦, 我知小朋友都好辛苦, 日日唔係返工, 就係照顧阿B, 有時我都覺得佢好犀利, 比阿B搞到 dom dom 轉, 都無發脾氣, 我 EQ 就比較低, 好容易發火, 上次仲差啲整親 mo 仔, 搞到小朋友喊曬口, 睇黎都要 relax 吓, 今日搭地鐵, 睇到啲旅遊廣告,近近地, 好似 sabah 同菲律賓咁, 都係幾千蚊, 好想去旅行, 問咗小朋友, 佢都話 ok, 等我今晚好好諗吓去邊好先...

人生..

滿以為結咗婚, 生埋 mo 仔, 成家立室, 可以專心工作, 但結果係比以前煩惱千倍, 一路以黎好擔心嘅嘢又終於發生, 上一次又係咁, 今次又係咁, 可以點做...
自從 mo 仔出世之後,我對家人同小朋友嘅睇法都改變咗, 比我感覺係佢地咩都為自己, 口口聲聲話對 mo 仔好, 但事實又係點呢..? 一句說話就話要返娘家, 見我坎走落街, 又要報復... 我落街跟本唔係發脾氣, 只係覺得好煩, 想抖吓氣.. 結果全家都知道我地嘈交, 咩面都無曬.. 比我感覺見親面, 都會有問題嘅.. 一種以前好驚嘅感覺又返曬黎..
屋企人, 我係到嘅時候咪咩都做足囉, 洗衫, 洗奶樽, 就算無叫做嘅都做埋.. 我唔係到,當我老婆係草, 理都唔理吓, 問心, 我同小朋友都對你地唔錯呀, 點解要攪到我地咁唔開心..?
有時我諗, 而家我係屋企嘅地位係咩呢.. 唔通又要好似以前咁樣嘅生活, 咁我攪咁多嘢為咩呢..就連我一生嘅心願'飛'我都放棄咗, 每次加人工, 出 bonus, 我都好期待可以去飛, 但到最後都係無.. 生 BB , 養 BB , 養屋企, 我從來都無埋怨過, 講得難聽啲, 比佢地同花係佢地身上嘅錢, 從來都比自己多, 但我嘅負出, 又換黎啲咩呢..? 人人因為我, 我因為人人... ? Gods knows...

唔識做人...

大多數父母都會對自己仔女好好, 但對仔女嘅另一半就唔同, 我以前都覺得我屋企會對個心抱好好, 但總結以往嘅經驗 , 跟本唔會,以前果個同我投訴, 我覺得係佢問題, 但而家小朋友都係咁講, 我又會信佢, 因為我同佢相處咗一段日子, 知道佢唔會無啦啦走去攪人, 同講人壞話, 自己個阿媽有幾煩, 我好清楚, 佢係我阿媽, 我又可以點呢.. 只係覺得想有家庭樂, 做老人家要識做囉.. 唔係嘅話, 只會另人討厭.. 小朋友, 我諗過喇, 你都係帶 mo 仔去藍田, 之後先去食飯啦,費事叫佢地攞比你食, 仲煩, 你話好唔好...? 如果有家務要做, 留返比我放工搞啦, 我知道你已經好辛苦, 明白你已經盡咗力架啦.. 我錫曬你...

點先係最好...?

唔知點解總係覺得小朋友對媽媽不滿, 我問佢, 又話無, 唔通係我多心? 我人生無咩願望, 只係想我身邊嘅人開開心心啫, 可能大家都好錫阿B, 老婆想好好咁教育佢, 等佢可以獨立, 至於媽同爸, 就覺得佢係一個細路仔, 要人愛錫, 唔好成日比佢喊,係呢方面, 我都唔敢比太多意見, 如果諗返自己細個, 有真係好多人錫, 可能係咁, 而家都好 chee 父母, 呢個都係我而家好仲好依賴屋企嘅後遺症, 其實係咪抱就一定唔好呢, 我都真係唔知..希望大家都可以因為 mo 仔將來著想, 唔好只睇眼前嘅利益, 佢而家係無記憶嘅, 喊吓無咩大問題..

多咗個b... 少咗個家...

從來都無諗過要係呢個 blog 到寫唔開心嘅嘢, 但今日終於忍唔住, 咩態度, 唔只一次, 好難得有假放, 一家人食餐飯, 又係咁, 知唔知咩叫遵重, 無佢地,有我咩, 你有呢個老公, 有呀 B 咩...

你咁想抱, 比曬你抱啦, 我咩都唔想理, 鍾意比你媽媽湊都得.. 總之唔好再煩我, 我工作已經好大壓力, 有邊個會關心我, 只係比煩惱我.. 學吓做人老婆啦.. 不知所謂..

十五朝

仔仔不知不覺已經出世十五日喇,咁日去睇醫生, 有 3.5 kg 重喇, 係我預期之內,佢唔喊嘅時候, 都真係好得意, 生命真係好奇妙, 一條虫虫, 一隻蛋蛋, 就有咗一個生命,對住 BB, 有好多時都發脾氣, 因為實在太多嘢要做, 同埋唔知佢想點, 成日喊, 真係火都黎, 不過其他時間見到佢, 又真係好鬼開心, 至於小朋友, 生完之後, 好似日日都有嘢唔開心, 好坦白講, 自己覺得佢嘅態度差咗好多, 唔通坐月嘅女人個個都係咁嘅, 我自己夠唔開心啦, 但又可以同邊個講呢, 又有咩人關心我呢, 係公司已經好唔開心, 好大壓力, 返到屋企, 都係想開開心心家庭樂啫, 唔通咁嘅要求都好過份? 係呢到要多謝父母, 外父外母, 如果無佢地幫忙, 都唔知點搞到咁多嘢.. 多一個 BB , 生活轉變咗, 要好好適應, 希望仗快啲雨過天晴啦...

mo 仔出世喇...

期待咗好耐嘅 mo 仔終於出世喇... 之前有好多嘢擔心, 包括大人細路嘅健康,　我一路都好驚生ＢＢ，好驚似我，別人唔會明白, 比人笑嘅感覺好唔好受, 佢係我其中一個至愛, 我當然會好錫佢, 唔想佢將來唔開心, 又驚佢會怨我呢個爸爸... 不過點都好啦, 佢嘅來臨, 我都係好好好開心嘅, 希望佢弟時做一個有用嘅人, 我對佢無咩要求, 順其自然, 最緊要健康, 正正常常, 我已經心滿意足.. 感謝神..

爸媽就好開心, 話 BB 好精靈, 好得意, 仲話我為咩唔開心.. 我都無, 只係擔心 gei.. 小朋友屋企都好興奮, 睇咗 BB 好耐.. 好開心..

係呢到要多謝小朋友.. 辛苦你喇.. 你快啲康復... 我皮帶你同 BB 去街街... 錫曬...

珍惜...

越來越懂得珍惜小朋友, 人生實再太多預計唔到嘅事..自問我係一個脾氣好差嘅人, 好容易就會找人出氣,好多時小朋友做錯好少事, 我都會即刻黑面,我都知咁樣另佢唔開心, 有時會偷偷地哭,真係好對佢唔住, 其實佢好好,從來都無怨言,一個簡簡單單嘅人, 但佢又唔係傻架喎,有時我覺得佢做嘢有紋有路, 好過我好多,可能身邊嘅朋友, 一個一個都有病, 我漸漸覺得做人應該放鬆啲,學會 enjoy 每一日, 珍惜眼前人,對佢地好啲,有一日自己或者佢地離開, 都無悔. 係咪...?

人生苦短..

今日一返到公司, 有錢仔就問我有無收到 mail...我都未有時間睇, 咪話無囉...點知佢話以前一個舊同事, 患咗肝癌...係好後期..我好唔開心, 因為以前都有同佢出黎吹水飲酒,上年又係咁, 今年又係咁..人生真係好難講, 今日唔知聽日事...做人真係好化...我越來越覺得,鐘意嘅事就要做..錢同工作, 都唔係最重要.. 因為當身體有事,要離開, 一切都唔可以帶走..我夢想係飛,之前同自己講, 如果有人工加就去學,而家又已經加咗, 但係都仲好似總係有好多嘢要顧慮...我應該點做呢..?

信任...

咁晚小朋友無啦啦哭起來,
細問之下原來驚我出去玩,
都明白點解佢會有啲擔心,
因為自己之前個底唔多好,
其實由我決定結婚果一刻,
我都無再有識其他人衝動,
我相信我對佢係出自真心,
如果唔係我唔會要小寶寶,
時間可以證明我對佢嘅愛....

公司世界..

越黎越覺得公司世界好殘酷...話說咁日有隻癲狗無啦啦走過黎亂吠..好心啦, 有事就睇獸醫啦, 如果唔係好易死,頭先食飯, 留係公司, 打緊 NDS, 突然聽到有人好大聲咁丙人,拎轉頭望吓, 原來我地大佬係到發難,話某幾個人同阿嬸自出自入, 無戴pass, 丙足成分鐘,我終於明白點解呢層樓嘅人, 個個都係咁, 成隻癲狗咁,因為有個咁樣嘅主人, 有樣學樣囉... 如果呢個世界有神, 我諗佢係最衰果個,點解, 因為佢做咗一班比禽獸都不如嘅人.....

為人父母

小朋友個肚一日一日咁大, 唔經唔覺已經有廿四周,開始要諗好多嘢, 又會好擔心,驚佢出世唔健康, 唔聰明,你知啦, 老豆其貌不揚, 仲有少少樣衰,如果似我唔知點算, 實比人笑,加上好鬼蠢, 真係越諗越驚,而家先知做人父母原來好艱難,以前成日埋怨父母, 而家先明白原來佢地超級犀利,我諗我人生最自豪係有一個錫我嘅父母, 同埋快樂嘅童年...

偉大

好耐無寫日記, 早幾日睇醫生,
小朋友有少少糖尿, 我好擔心,
有 BB 其實好大壓力, 最辛苦係小朋友,
BB 你唔好頑皮, 蝦媽媽啦, 知無?
爸爸媽媽都好錫你架,
我想多謝小朋友, 因為佢為我大肚,
生小小朋友, 好辛苦, 好偉大..

決定...

諗咗好耐想再飛, 但有好多嘢要顧慮, 其實近來都好努力去祈禱, 希望神會幫我安排, 咁啱早兩日去接小朋友放工之前, 行旖書局, 無意之中搵副本書, 講一個女仔, 為自己飛行嘅夢想, 去到菲律賓學飛, 我都真係好佩服佢, 如果我仲未結婚, 我諗我都會即刻起行, 不過現實都係無可能, 我問小朋友我可唔可以去, 佢都話唔得啦, 其實問之前都已經知道唔得架啦, 只係隨口問吓, 如果佢同我講話每個星期都要去另外一個地方三日, 我都唔會比佢去啦, 一來都真係好鬼擔心佢, 二來真係唔捨得, 諗咗好耐, 都真係唔會放棄呢個夢想, 所以我決定今個月開始比小朋友幫我儲錢, 一個月二千蚊, 五年啦, 我就夠錢去飛, 努力, 加油..