財爺派糖..

今日財爺公佈財政預算案, 政府今年有 ~500 億盈餘, 都算是唔錯, 有幾樣措施仲係對我非常有利嘅, 第一, 200萬以下嘅樓嘅買賣印花稅調低至定額100元. 第二, 進修嘅免稅額由2萬元加至每年6萬元, 第三, 都係我最開心聽到嘅, 就係退返一半嘅稅款, 有成 $15000 喎, 真係幾好, 最後一樣就係, 免收兩季差餉. 睇黎香港今年真係幾好咁喎, 希望人人有工做, 身體健康最重要..

個股市跌, 跌, 跌... 一早就收到阿媽電話, 話美國跌咗 400 點, 好驚股災, 係咁話耍放咗啲股票, 我又好惡咁鬧佢, 驚, 驚, 驚, 咩都話驚, 驚就放曬佢啦, 跟住 cut 佢線, 我知佢好唔開心, 但我又真係忍唔住到氣, 鬧咗佢, 眼睇見佢本來好多隻股票都可以搵好多錢, 但升咗少少, 又或者跌咗少少, 就放曬, 倒頭來, 搵少好多, 佢因為省錢, 日日帶飯, 都係省果少少, 但買到好 嘅股票, 又唔會長揸.. 咩都驚... 我覺得我嘅缺點都係佢地 inherit 比我嘅.. 之後, 唔忍心, 打返比佢, 叫佢由啲股票放係到, 唔好咁擔心, 因為我覺得呢次係正常調整.. 唔駛太擔心... 睇吓我隻瑞安就知啦, 賤價放, 而家升返曬, 只係幾個星期嘅事.

死靚仔, 見我唔舒服, 主動幫我搵係香港仔同海恰嘅醫生, 仲有埋中原地圖, perfect, 同佢做朋友, 都真係唔錯, 可惜佢又 under 我, 我係無得選擇要對佢有要求嘅, 商業社會, 無法, 希望佢比啲心機, 而自己都要好脾氣啲, 盡量教佢, 佢都應該係一個可做之才..希望佢嘅工作熱誠一路咁 keep 住啦...

阿姐今日叫我簽 pdr, 之前又話唔駛做, 今日都無 go through 過就叫我簽喇, 因為升咗職嘅關係,只係做兩個月, 但就只係 MR1, 唔知會唔會影響今年嘅 bonus.. 話時話, 好大期望架, 直接影響我繄呢幾個月嘅情緒..

今日收咗新 order, 要做一個好大好趕嘅 project, 之前擔心無嘢做, 而家又驚會好 busy, 真係盾... 但我始終覺得 user 同我唔係太 friend, 而且呢個 project 之前係另外一個同事跟開, 而佢又好user 寛心, 但 user 就好似唔係好 like 我, 咁我嘅 role 係咩呢..?

但阿姐有理無埋都 assign 咗一堆嘢比我, 三月中要搞好, oh my god...

模擬飛行...

按照完定計劃, 咁晚終於 kick off 我嘅香港-台北之旅, 大約飛咗三次, 但去後最後都未能成功降落呢個台北機場, 但每一次再試, 都比前一次好, 去到最後果次, 原本可以順利降落, 但因為手忙腳亂嘅關係, 忘記按某些鍵, 最終只可以係呢個台北機場上空飛過, 本來想再試多次, 但望吓個鐘, 都已經 12:00 a.m. , 係時候收手, 如果唔係又玩到兩三點, 傷身...

我真係發覺今年運氣極差, 我現代表我果 team 去抽呢個 spring dinner 嘅 table, 抽到坐偏廳, 遠到連個 stage 都望唔到, 正確黎講, 應該係唔屬於呢個正常會場嘅範圍, 對唔住呀, teammate, 要你地坐到老遠, 而家唯有希望你地啲飛抽到獎啦...

玩得太過投入, 都唔知小朋友 send 咗個 sms 黎, 只可以係瞓之前先覆佢, 真係唔好意思...

感冒...

小朋友今日真的病倒了, 咳得比之前厲害, 睇見佢咁, 真係心痛, 原本諗住一食完飯就返屋企玩我嘅 flightsim, 但都係唔忍心, 去接佢放工, 佢挨住我瞓咗一陣, 唔知有無好啲, 一早叫佢睇醫生, 但佢又唔聽, 點解佢咁抗拒睇醫生, 真係男女醫生都唔肯架噃.. 無辨法啦, 因為有買咗樽感冒茶比佢, 希望佢飲完快啲好番啦, 小朋友, 沖完涼, 飲咗藥, 好快啲瞓, 唔好 online 喇, 知無..?

雖然會有一段時間無得揸飛機, 但無所謂啦, 我玩住 flight sim 先囉, 係 flight sim 嘅世界到, 都有好多嘢要學, 而且係 operation procedure 上, 同真嘅其實差唔多, 都可以算得上係一個有益身心嘅玩意, 何況我最近終於攞返 cpa virtual 一個好靚仔嘅 id, 呢個簡直係我嘅 dream id, 因為佢同我係香港飛行總會嘅 number 係一樣嘅, 大家都係 183.. CX183 同 L183, 非常好.. 要好好 keep 全佢, 但一定要係一個星期內係呢個模擬飛行世界飛一次, 如果唔係個 account 就會取消架喇, 我已經好努力咁去睇 material, 一定要 meet 到 deadline, 路線都已經諗好, 香港往台北... 航程大約個半鐘, 幾好...

一張紙條..

今日心情唔多好, 我自己都唔知點解, 可能受早兩日嘅飯局事件影響掛, 一路都謹謹於懷, 係個心到谷住谷住, 加上見到小朋友不斷咁咳, 又唔去睇醫生, 係 karaoke 又唱唔到歌, 原本每次去 karaoke 都好開心嘅, 但今次只得我一個人唱.. 而我又唔識唱.. 搞到氣氛好淨.. 以上嘅原因就可能係我發咗一次好大脾氣嘅原因, 其實, 我嘅性格都幾難頂架, 都好無理取鬧... 小朋友都唔敢惹我, 嘖係唔出聲, 但原來侉寫咗張紙條放咗係枱, 然後去咗瞓覺, 我起初都唔唔知, 以因為佢又發脾氣, 唔出聲, 走咗入房.. 直至佢出黎,, 我先發覺佢寫咗張紙條比我, tum 返我.. 可惜, 我後來又再發脾氣.. 床但最後都係 "床頭打交, 床尾和'.. 呵呵.. 佢最後都要 "求"我.. 可惜.. 唉.. 真係, 有得睇, 無得食... 善哉... 善哉...

今日係我第一次煮呢個"紅豆綠豆沙糖水".. 點解廚神從來都無整過? 因為真係對住家糖水無咩興趣, 可能係童年陰影.. 細個媽媽整嘅糖水實在太甜, 次次食親都好似受難咁.. 仲要食唔曬比人鬧... 所以由細到大都對糖水無咩好感....直至出黎做嘢, 有機會試街外嘅糖水.. 先發覺原來好食好多, 更加肯定自己嘅味覺係正常嘅....

不過今次我煮咗大約五人份量, 有排食...

突如期來的假期...

小朋友今日突然之間 call 放假, 真係好, 佢一早黎到我屋企等爸媽同家姐上黎拜年, 之前仲一齊做運動, 可惜時間太少, 未能完成, 佢地黎到坐咗一陣, 決定去呢個黃珍珍食晚飯, 但媽媽發覺無皮帶 coupon, 於是就要返藍田攞喇, 我都擔心小朋友會唔鐘意, 但佢有無喎, 可能我之前嘅陰影, 好多時都驚佢唔想同我屋企一齊, 返到去, 都係食, 食, 食, 話時話, 小朋友好似多咗個小肚腩, 唔通係比我操肥咗..? 今晚食泰國嘢, 有我最鐘意食嘅 curry crab.. 我真係好鐘意食蟹.. 係一個蟹痴... o但小朋友就一如以往, 係街或者係人地屋企係唔會落手食蟹嘅, 我初時都有唔開心, 因為覺得佢無禮貌, 爸媽不斷嗌佢食, 佢都係啋你都傻, 但好快我又無事喇, 因為我明白到, 每個人都想有佢嘅性格, 我地唔應該要佢地完全就曬自己嘅, 係咪..? 食完飯, 週圍行咗一陣就返屋企, 睇吓 video, 小朋友真係好似好鍾意彥祖喎, 睇得好 enjoy.. good...

最後要回應吓小朋友嘅 diary.. 佢話比著以前, 如果佢突然有假, 我一定會諸多藉口話陪唔到佢... 係架咩, 我真係咁衰..?? 咁就低打喇.. 不過, 以後都唔會喇.. 放心

當我偶遇你....

我係一個 web 白痴, 因為從來都無學過 web programming, 但我真係好想放一首歌係我嘅 blog 到, 上網搵咗好耐, 終於知道點樣係呢到放首歌喇.. 希望你會喜歡啦... 而家已經兩點喇, 好眼瞓.. 不過我一做起嘢上黎就唔停得手, 呢個係我嘅缺點定係優點呢, 見仁見智啦.. 呵呵...

呢首歌原本係我想係情人節送比你嘅, 但後來諗諗吓, 送首歌好似好 cheap 又怪怪地, 所以而家放係個 blog 到.. 你慢慢睇吓啲歌詞啦...

「昨天，流落冰天雪地，無光線、沒有生機；
當我偶遇人間一個你，才真正發覺熱愛滋味！

你的手能令孤單遠離，還給我太多驚喜；
於這浩瀚人海找到你，如昏暗世界，重見希冀...

今天我決定，承諾將心給你，
同行一生、同嚐歡欣、同心分享痛苦傷悲；
今天以後，牽手走到白頭，
窮這生全力愛你！

也許，前路荊棘遍地，狂風裡白雪紛飛；
只要在路途中緊靠你，陽光變晦暗，仍覺很美...

今天我決定，承諾將心給你，
同行一生、同嚐歡欣、同心分享痛苦傷悲；
今天以後，牽手走到白頭，
窮這生全力愛你！


請聽這誓言：忠貞的愛從無變，能遇著你是我福氣！」

從未如此失望...

搞咗好耐嘅 gathering, 到最後都要取消, 我都唔知講咩好, 到最後我好堅定咁 send 咗個 sms 比大家, 話個 gathering 要取消, 我唔會再好似以前咁拖拖拉拉.. 我已經盡咗我最大嘅努力, 無悔.. 係呢到同啲原本可以黎到, 但最後因為要取消而影響到佢地 schedule 嘅朋友仔, 講句對唔住, 因為我實在太唔開心, 而且咁少人可以到, 同我原意已經背道而馳... 原諒我嘅決定...

最後, 約咗朋友仔上屋企食飯, 睇黎, 係我好唔心嘅時候, 只有佢會陪我...

終於明白...

大家有無發覺去見工嘅時候, 啲 interview 你地嘅人到最後都會問, "你覺得自己有咩缺點同優點?", 以前覺得佢地問呢啲問題係好無聊, 因為被 interview 果個一定答 model answer, 但經過咗呢幾年嘅發生嘅事, 我先至發覺呢條問題其實好有意義, 如果人個人想成功, 最少要知道自己有咩優點, 知道唔現代表你一定成功, 但唔知自己嘅缺點就註定失敗, 而我嘅缺點就係太過三心兩意, 無論感情又好, 事業又好, 連簡單到自己嘅興趣都會三心兩意...

感情.. 好似每段感情都出現兩個選擇, 成日都三心兩意, 將兩個人去比較, 有時覺得係某一方面, A 好過 B, 而另一方面, B 又好過 A 喎.. 如事者, 就一腳踏兩船, 又或者, 更差嘅搞婚外情.. 就係呢個缺點令我同 C 小姐失去咗最寶貴嘅嘢.... 其實呢個世界係無人完美嘅, 如果想搵一個人完全附合曬自己嘅要求, 跟本無可能, 人越大, 越發覺, 無論發生咩事, 你嘅令外一半都會係你身邊先係最重要, 另外, 我會去諗究竟邊個嘅生活方式適合自己, 同小朋友一齊嘅日子, 佢有兩句說話我係好深刻嘅...

第一, 係發生係情人節, 原本去食牛排, 但諗一諗之後佢話, 情人節去食, 咪差唔多一千蚊, 好貴喎, 最後我地去咗 satay king, 好簡單咁食咗餐飯, 但好開心

第二, 時間地點, 我就唔記得喇, 佢話, 錢同人, 我會撰人, 佢講嘅, 我都真係信架, 點解, 我唔知, 可能係佢一路以來比我嘅信任喇..

總之, 而家嘅我想全心全意咁對佢好,.. 但小朋友, 我都希望你會對我有多啲信任..

事業.. 之前搵到兩份工, 人工同間公司都好應該 ok 嘅, 但最後係三心兩意之下, 搞到間間公司嘅 HR 對我嘅感覺負面, 更加得罪咗其中一間嘅高層, 最慘就係連累咗我個 friend.. 至於而家呢間公司, 因為走嘅關係,升咗我, 人工, 同之前話加比我嘅 percentage 差咗 4-5 %, 錢都唔係一個最大嘅問題, 最衰嘅係得罪咗一啲小氣嘅人, 無運行... 但一切都已經 finialized.. 後悔都無用... 而家嘅我, 對工作真係無咩熱誠... 期待突破.. 希望我想做嘅嘢有回音, 不過都真係幾妙想天開, 呵呵...

興趣... 一時玩車仔, 一時玩直昇機, 但到而家都兩頭唔到岸, 無樣精.. 至於飛, 由開始到而家都已經 supspend 咗個 account 兩次, 比咗三千幾蚊, 到最近又停咗... 睇黎都係了了無期, 點解我做人咁失敗, 人地 grad 無耐, 都有十幾皮去讀 master, 而自己, 少少錢去飛都無.. 真羞家.. 最鐘意放馬後炮嘅我想講, 我是但一隻股票唔放, 啲錢都夠我個個星期去飛, 飛足兩年....頂... 而家為有寄望今年 2007 有收穫啦...

另外一個缺點就係太過在意別人嘅感受, 搞餐飯局, 就呢個, 就果個, 又諗食咩, 驚食得 cheap, 又好似對唔住大家, 西貢又諗過, 酒席又訂過, 但因為人數唔夠而取消, 仲要比某某單打咁話. "黎嘅動機係咩, 賀你升職加薪?" 老實講, 從來都無諗過有咩值得慶祝, 只係之前有人走, 請過我食飯, 我回禮啫, 同埋去多謝一啲係工作上幫過我嘅人, 就係咁簡單, 搞咗好耐, 啲 email send 黎 send 去, 諗住就多啲人, 但最後, 到今日, 有好多人話比我知黎唔到, 初頭勁唔開心, 後來, 睇開咗, 無嘢啦.. 照去.. 而家諗返, 最初真係唔駛搞咁很多嘢, 攞黎煩...

總括黎講, 我做人點解咁失敗, 因為 "三心兩意" 同埋 "太理別人感受"

2007.. 豬年.. 係我本命年, 我要黎一個大轉變.. 各位, 睇住啦..

愛....

最近睇到一遍關於愛嘅文章, 覺得寫得好啱.. 文章講到, 要知道一個人是否真的愛自己, 分手之後才會真正知道.. 有人可以對分開嘅人視如仇人, 有人可以再見亦是朋友, 其實, 當大家依然相愛嘅時候, 幾肉痳嘅說話都可以講, 幾辛苦嘅都願意為對方做, 又或者好唔願意嘅事都會照做, 但萬一有一日分開咗, 會點呢, 真係要到分開之後先知...

人生經歷過數段感情, 都發覺文章所講嘅幾啱, 但話分兩頭, 我地應該正面啲去睇感情, 我相信真正愛一個人, 可以無條件為對方附出, 即使將來因為咩嘅原因要分開, 都係無悔嘅... 另外, 信, 都係一個重要嘅原素, 過份嘅信任, 可能被人利用, 欺騙, 太少嘅信任, 又會令對方反感, 好難去講應該有幾多信任, 總之, 要別人相信自己之餘, 自己都要做好本份...

講完感情, 講吓工作, 今日返工都仲係勁 holiday mood, 返工等收工, 終於請咗 team 嘅同事食晏, 了咗件心事, 唔知佢地滿唔滿意, 不過無所謂啦, 我都唔係啲好識搞關係嘅人, 盡咗力, 無悔架喇... 可惜今日天公不做美, 去食 lunch 嘅時候落大雨, 好似明玩我咁.. 同事門, 真係唔好意思, 令你地濕身.. 食埋聽晚嘅打邊爐, 就大功告成.. 希望順順利利啦...

年初四...

今日嘅節目, 一早已經安排好曬, 首先係去世伯, 伯有屋企拜年, 之後就睇呢套, "心想事成", 套戲都 ok 啦, 都有啲嘢笑吓嘅, 但我總係覺得佢好似大雜會咁, 將啲人溝埋一齊, 故事又無咩喎, 都係一般嘅新年賀歲片, 得淡笑啦. 如果同 "門徒" 比, 就真係差好遠喇, 搵日要同小朋友去睇多次, 因為我真係覺得幾好睇, 呵, 今日又飲同樣嘅湯, 但好似無咩效,上次飲完好鬼精神, 今次又好似無咩特別... 睇完戲之後, 就去呢個 AIA 嘉年華, 個個 game 都差唔多要排一個鐘, 一開始我地就濕身, 但都真係幾好玩..總共玩咗五個遊戲,.. 以下就係我對佢地嘅玩評...

最好玩嘅就係瘋狂老鼠, 咪睇佢行得好慢, 但完原來上咗去玩, 先知原來係咁激, 小朋友差啲連眼鏡都飛咗出去. 好彩佢足住, 如果唔係就損失慘重

講到浪漫呢, 應該係摩天輪, 不過如果可以一個車廂只係得兩個人, 咁就 perfect 喇.. 但今日玩遊戲嘅時候, 我發現一個秘密, 原來我好似有啲畏高架喎, 玩摩天輪同過山車嘅時候, 原來我好驚架喎, 但點解我揸飛機果陣又唔驚架呢, 呢樣嘢就連我自己都解釋唔到.. 死啦, 唔通我唔適合揸飛機... ??

講到最激氣就更係碰碰車, 四個 gucci 死八婆打尖, 仲要大聲夾惡, 本來我都好忍得, 無出聲, 但佢地搞咗好耐, 比人話完, 都唔肯死心, 我火都黎, 咪鬧佢地鑊金架囉, 另外一個原因, 其實都有啲私心嘅, 因為我真係勁憎人攞住 gucci 同 LV 袋, 呢個都係搞慶我嘅原因, 不過, 佢地最後都好順利咁打尖, 因為大部份嘅香港人都係怕事嘅, 由得佢地,, 點解會咁架, 見到唔公平嘅嘢, 都唔出聲, 啲唔啱嘅人反而理直氣壯... 再咁落去, 香港真係無咩希望....

玩曬我地心儀嘅機動遊戲次後, 我地就轉戰呢個攤位遊戲, 成績都算唔錯, fu fu look look 咁又贏到隻 disney dog 比小朋友而我自己呢就有隻 m & m 嘅公仔啦, 講到最後同大家分享一個笑話..... 以下對白, 真人真事...

T: 不如玩呢個掟飛標....
C: 你射唔射到架...?
T: 淫笑住咁答... "我更係射到啦"
C: 望住 T 先生係到不斷淫笑...
T: 有理無理, 一嘢 "射出去", 咁就中咗紅心, 有獎...呵呵..

一個好開心嘅新年假期, 就係歡樂聲中結束.. 小朋友, 多謝你比咗一個好開心嘅假期比我, 新年後要努力工作... 搵多啲錢,比我愛嘅所有人有安穩嘅生活...

嘩.. 差啲唔記得 mention, 小朋友送咗隻飛機比我做新年禮物, 係一架類似食物小販賣機到抽嘅, 型數係 ANA 全日空 747SR, 好靚架, 我已經一早返公司已經濟砌好咗, 放咗係公司枱頭, 啱啱見到, 所以要加番落個 blog 到... (26/02/07 17:28)

年初三..

中國歷史原遠流長, 真係有佢嘅道理, 今日係年初三, 赤口, 真係幾鬼準, 差啲同小朋友嗌大交, 講真, 係呢件事黎講, 道理又真係唔係我呢邊, 所以佢唔開心, 都係正常, 再加上, 新年嘛, 唔想大家唔開心, 所以呢, 我都做咗超級忍者, 都 tum 咗佢好耐架, 好彩, 最後都無嗌交, 講返唔開心嘅原因, 係我太 open, 呢樣嘢我又真係無諗過喎, 興之所至, 又唔會去理會地點同時間架喎, 做人可須太執著, 想做咩咪做囉, 影響唔到人咪得囉, 不過, 今時唔同往日, 我有責任令我女朋友安心, 所以以後做任何嘢都會三思, 唔會再亂黎, 不過今次妳又真係有改善, 好快就無唔高興, 非常好.. 底錫...

今日新界一日掃街團, 一早起身, 上媽媽屋企食完早餐, 就撘西鐵入 tuen mun, 我都係第一次撘西鐵去到尾站, 一落車, 大家都覺得好肚餓, 一支火箭咁 bill 咗入去 mac don doc, 食咗包薯條,可樂同埋一個 strawberry 新地, 好味, 跟住就逛咗附近商場一陣, 突然衰多口嘅我就講咗啲陳年舊事比朋友仔知, 佢就開始擔心, 跟住 就唔開心喇, 所以話呢, 唔好講太多以前嘅秘密比現任女友知, 唔係你一定好很頭痕, 跟住大家唔出聲行咗去附近公園睇人放船仔, 係我好努力之下, 佢終於無再唔高興喇.

之後我地又傻吓傻吓咁搭輕鐵去 yuen long. 第一次由 tuen mun 撘輕鐵去 yuen long, 都 ok 舒服喎, 唔會好似巴士咗 chor 吓 chor 吓, 又有位座, 正. 去到 yuen long 又係食, 搵到間上次係壹週刊睇到話好好味嘅潮州 lo mei, 條人龍都幾長, 不過好彩唔駛等好耐, 之後係公園仔座低開餐, 嗯, 比我想像之中有啲失望喎, 無本週刊講到咁好食, 啲骨都唔入味嘅.. 可能我爸爸整得仲好食.... 食完嘢做咗一陣運動, 行石春, 嘩.. 痛到我 ar...唔通我成身都有病..?

搞完一輪, 去咗買老婆餅, 原來朋友仔都好錫屋企人, 記得佢地鐘意食咩, 我就比人玩啦, 叫我去恆香買牛肉乾, 頂, 邊樹有呢, 賣嘢果個人覺得我 sort sort 地..跟住朋友仔好想去大榮華食晚飯, 咁咪去囉, 我以因為佢有啲咩咁想食, 原來只係馬拉糕, 真係比佢吹漲.. 後來見到最少要叫八件, 咁就無食喇... 最後大家決定去 B 仔涼粉食少少嘢, 去返新順興買啲 lo mei , 跟住就返屋企.. B 仔啲 chilly 雞翼尖又真係幾好味..

返到屋企, 食完晚飯, 就更係做運動啦,.. 做呀, 做... 正.. 一個好開心嘅年初三咁就過咗喇... 真係合皮....

開年飯...

小朋友今日收早, 所以可以一齊去買咗啲生果, 跟住上媽媽到食開年飯, 可能個人大咗, 越黎越珍惜一家人一起嘅日子, 難得小朋友又唔會唔高興同我屋企一齊食飯同去街, 我真係好好好開心, 回想以前嘅日子, 新年係好唔開心嘅, 每次返屋企都要嗌大交, 而且逗留嘅時間都係好好好短嘅, 只於而家, 就好唔同喇, 我可以一早上去, 食完早餐, 跟任同佢地去買埋餸都仲得, 同以前簡直係天淵之別... 媽媽都明顯比以前開心, 以前想話同家姐一齊去睇出戲, 你真係咪駛旨意, 而家, 朋友仔好大方咁話無所謂, 係呢到真係要同佢講句.. 多謝你嘅體諒.. 你放心, 我唔會再頑皮架喇... 因為生命有你...

小朋友唔開心我 send sms 比舊情人, 我都明白, 但我都想講, 我又唔會對你講大話, 正如我之前所講, 係呢個 blog, 我咩都會講, 因為呢到真係寫低我所有嘅生活點滴... 係新嘅一年, 我真係希望佢可以開開心心, 送上一個祝福, 因為我真係有負於佢, 係我做錯事, 希望你明白同體諒..

騎馬仔, 差啲出事, 下次真係要小心啲, 唔係以後都無得再玩, 咁就大大鑊喇...

大年初一 (必是一生易發)

今日係大年初一, 一早起身一裝身, 跟住就出門口, 去同爸媽, 家姐拜年, 今朝真係好好運, 座到一架車牌勁靚嘅的士, (BZ1328). 真係幾好, 係我心情勁好之下, 比咗多少少嘅 tips.. 個司機叔叔都好開心... 新年嘛, 樣樣都要講意頭啦.. 舊年座著架唔多掂嘅的士, 勁唔開心, 今年就非常滿意.. 個司機又醒目, 比我係大門口落... 一個字, 叻...

係屋企, 收到舊同事嘅 sms 黎拜年, 我當然有 reply 啦.. 另外, 都 send 咗啲祝賀嘅 sms 比老細, 啲街客嘅高層, 仲有舊情人.. 雖然知佢唔會覆, 但無所謂啦, 希望新一年佢身體健康, 開開心心.. 至於發財就隨緣啦..

望吓出面, 個天都好灰喎, 希望呢幾日唔好落雨啦, 我有好多節目架嘛, 呵呵.. 小朋友努力呀, 仲有 4 個鐘你就收工喇, 好嘢, 聽日可以陪我, 我要去騎馬仔, 同睇煙花....

年三十...

今年收穫好豐富, 係 aigle 買咗一件 jacket 同一件恤衫, 平時真係唔會舍得買, 但佢係 made in japan 同埋今年真係好開心, 所以要獎勵吓自己, 小朋友都話好睇, 行花市又有收穫, 話時話, 今件好似係我第人年去行花市有買嘢, 年年都話想買個大鎚, 今年終於買咗, 真係超大, 好犀利, 一路行街, 都不斷有人話, 嘩, 好大呀..

今日同小朋友講起驗身, 我真係好驚, 一種講唔出嘅驚, 做人真係好矛盾, 唔知點做好呢.. 我會唔會好自私呢.?

新嘅一年希望身邊嘅親人同朋友仔, 最重要係有健康, 錢都係其次, 係咪...? 仲有兩分鐘就到豬年喇, 係呢到同大家講句新年快樂. 萬事勝意...

年廿八...

我日年廿八, 中國嘅傳統係洗 lat dat... 我都應一應節, 啱啱拖完地, 洗完 toilet.. 好彩之前已經整好曬 kitchen 同其他嘢, 如果唔係今晚就大大 wok.

小朋友今晚返 night, 真辛苦.. 好彩, 黎緊年初二,三,四都可以陪我..yeah.. 今日無咩特別, 成日係公司都係 holiday mood. 等收工,曼開心莫過於終於都約好曬所有人同幾時去邊到食.. 睇黎呢個 change 都令大家滿意, 幾好啦.. 有時我真係想得太多, 其實好多嘢都係好簡單, 只係我太過執著啫..

最後要同女朋友仔講句對唔住, 我好似越黎越無心肝, 又唔記得佢返 a/n. 真係要係來年好好改善...

笑容..

今朝一早返到公司, 見到矮 d dub 迎面行過黎, 出奇地唔係黑口黑面, 有啲笑容, 同我打招呼, 講起呢個矮仔就諗起女朋仔暗 inch 我嘅說話, 話說有一日我話佢知公司有個死矮仔, 佢就問我喇.. "佢仲矮過你架", 我就答 "唔係喎".. 佢就 inch 我, "咁你又話人地係死矮仔".. 車, 我鐘意呀, 係睇佢唔信眼...吹咩..

香港嘅後生仔.. 有啲文化啦.. 吓吓講粗口鬧人.. 不知所謂, 你係公共地方大大聲咁講.. "咩咩長又長, 夠你賓周長" , 我當然要望吓你啦.. 咁你又要鬧我 "望咩能嘢".. 我心諗, 之唔係望你個 "能樣" 囉... 有你啲咁嘅未來社會主人翁, 香港真係 "充滿希望".. 頂..

唉.. 想發達, 跟我買股票啦.. 不過一定要係我放咗你先好買喎, 我真係無橫財運, 買親隻隻都趺, 但一放咗無耐, 就 bla bla 聲咁升.. 真係吹漲, 我都唔貪心呀.. 只係想搵夠錢娶個老婆仔, 之後有多餘錢就完成我嘅夢想啫, 生生性性啦.. 唔該.. 唔該.. 財神爺, 關照吓細佬...

情人節...

今年可以話係我一生人之中最特別嘅一個情人節, 所以好想騎馬仔, 可惜最後由於時間同體力關係, 最後都無法達成心願.... 可惜... 我個人鐘意先苦後甜, 所以講完啲唔開心嘢先, 而家可以講返啲開心嘢喇...

特別嘅原因係, 我咁大個人都未試過可以一心一意咁同一個自己所愛嘅人去過情人節, 係呀, 係愛, 而唔係鐘意咁簡單, 愛同鐘意有咩唔同, 有架, 有愛, 你會去包容同盡力令佢開心, 唔會好刻意, 一切都係好自然嘅, 禮物, 花, 燭光晚餐, 通通都無, 但過得好開心喎 (唔知係咪我一廂情願嘅諗法呢, 呵呵...) , 晚餐只係係 satay king 食一餐好簡單嘅飯.. 樣樣都好味, 除咗果碟瀨尿蝦.. 好唔新鮮, 但只係我唔醒目, 明知只係 $78 一碟, 一睇個價錢都知無好嘢啦.. 仲點呢味.. 真係死蠢.. 好彩, 小朋友都無唔開心, 啲個咪佢可愛之處囉.. 食完飯去咗維園行花市, 無咩特別嘢賣, 大部份都係啲吹氣公仔, 一般啫, 我地都係空手而回.. 不過行到最後居然見到一當攤位, 仿效平時係觀塘首先派嘢比人, 然後 tum 人買嘢嘅奸商... 連花市呢啲咁嘅地方都夠膽騙人.. 犀利...

最後我一定要多謝小朋友比咗一個開心嘅情人節比我啦...

期望...

我對唔同種類嘅人都有期望...
爸爸.. 希望佢睇錢唔好睇得咁重要.. 但話分兩頭, 佢願意將幾年全年嘅人工供我去澳洲讀書, 我相信即使有的家境比我地富裕嘅家庭, 佢地嘅父母都未必願意咁做, 正如咁日workshop 嘅 speaker 所講, 我從個仔小學開始已經同佢講明, 係唔會供佢去外國讀書嘅, 要去嘅, 自己儲錢... 爸爸, 我以你為榮.. 我覺得你叻過李x誠.. 但可惜佢只會好似一隻牛牛咁努力工作, 做咗大半生到退休, 都無咩錢儲... 我要努力工作, 比佢有好日子過...

媽媽.. 又係將一生貢獻曬比我地兩隻化骨龍... 希望佢唔好咁 law saw 啦.. 少啲 complain.. 不久將來比我地係新屋打邊爐...

姊姊.. 唔好成日唔開心.. 一份工啫.. 做埋今年都唔知有無得 extend 啦.. 唔好太過緊張.. 身體要緊...

女友/太太.. 老土啲講, 無論將來貧病富貴, 佢都唔好掉低我....

前妻.. 改變吓佢嘅性格, 多啲明白人地嘅感受, 睇開啲, 咪開心啲囉...

舊情人.. 開開心心咁生活, 如果可以啲話, 希望再見亦是朋友...

自己.. 聰明啲, 有能力養妻活兒...

仲有半個鍾多啲就係情人節, 今年特別有意義... yeah...

第一個 blog

一個好懶嘅人, 點解會去寫 blog 呢, 呢個答案就連我自己都唔太清楚, 只係呢一刻真係好想有個地方比我寫吓我嘅生活點滴....

係呢到要多謝 C 小姐對我嘅包容同忍耐, 以前嘅我, 做咗好多錯事, 傷害咗佢好多人, 難得佢肯原諒我, 我只可以從心底裡講句多謝, 至於一啲唔可以原諒我, 視我如無物嘅人, 我都要同佢講聲對唔住, 好坦白咁講, 當初嘅選擇只係出於一個原因, 就係我可以全心全意咁去愛邊個, 比到幸福佢, 最初 C 小姐比我嘅感覺係一個好多心嘅人, 正所謂各行各業嘅朋友仔都有, 我都有所保留.. 識落咗又覺得唔係架喎, 問心果句, 我真係一個無咩條件嘅人, 人到中年, 錢又無, 老婆又走佬, 得層負資產嘅居屋, 老豆話事齋, 咁大個人都係得 look 棍, 但佢又鐘意我, 真係有啲唔明. 不過而家都好, 起碼出街唔駛驚, 可以一心一意咁去對一個人, 果種心情係好唔同嘅, 所以話呢, 人最緊要唔好貪心, 一心真係唔好可以幾用, 如果唔係到最後損失嘅只會係自己.. 我做錯事已經令我同 C 小姐失去一樣好寶貴嘅嘢.. 對唔住...

今日去上 career development workshop.. 只係收到一個信息, 就係叫大家諗定一個想去嘅地方, 近又得, 遠到去一個唔知叫咩名嘅荒島又得, 我心諗, 講你地就天下無敵, 做就有心無力, 簡單啲講, 咪就係賣我地豬仔囉, 正所謂, 敵不動, 我不動, 煮到黎先算....

今日行街, 聽到一句說話, "情人節, 咪係啲要洗錢又要 tum 女嘅節日囉".. 嘩, 無人搵枝槍指住你去做架嘛, 兄台, 唔願意咪飛咗條女, 咩都慳返啦... 係咪, 唔駛講得咁刻薄...

食飯, 搞到我好唔開心, 人人都好似無咩反應, 最後應該有八個人, 唔好煩, 一於夠人就去擺返圍, 唔夠人就去西貢食海鮮, 日子都已經擇好, 年初六, 提早慶祝人日, 唔就得咁多人架喇.. 正所謂, 就就就, 唔就就黎應就啦...

嘩係時候收手, 打咗好長.. 各位觀眾, 晚安...