中秋節

眨吓眼又過咗中秋節喇, 今年中秋過得特別開心, 一來唔似舊年咁多擔心, 二來小朋友第二日唔駛返工, 可以去到好夜, 三來無落雨, 可以賞月同玩爉燭, 好開心, 希望以後嘅中秋都可以同小朋友和屋企人一齊過, 今年小朋友係我屋企食飯, 辛苦爸爸, 佢煮咗好多餸, 早一日佢已經買咗啲蟹喇, 好彩到煮個日都仲係好生猛, 佢仲話呢啲先真正係大陸蟹喎.. 係唔係, 我又真係唔知喇, 只知道佢好好肉, 超正..

話時話, 今年食咗兩餐中秋飯, 第一餐, 因為要就小朋友所以早咗食, 第三餐就係正日食, 真係好鬼著數, 呵呵.. 咁日上完大陸, 都無咩特別, 只係食同睇人攞獎, 不過最慘就係坐車, 去又只係兩個鐘, 但返黎就要成四個鐘, 超慘.. 最無聊就係要坐係個 hall 到四個鐘, 睇人攞獎同講廢話, 真係好難頂, 夜晚餐飯仲搞嘢, 啲餸超唔好食, 你試過食魚丸有條成吋長嘅骨未呢, 呢味餸個名都怪過人, 鮑汁扒雙丸. 我一生人, 食過咁多餐晚飯, 都未見過呢味餸, 佢諗到都真係好犀利.. 最終我都係食唔飽, 返到香港十二點幾都仲要買碗車仔宙麵醫肚, 但係晏晝果個 lunch buffet 反而 ok 好味喎, 點解會咁架呢?..

係個 event 到, 見返以前一個 senior, 而家佢已經好高 grade 喇, 睇曬成個大陸嘅 IT department, 又同個 IT director 排排坐係個 stage 到做 presentation, 仲攞埋個全年大獎, 過去嘅成績完全得到大佬闆嘅肯定, 我都覺得佢實至名歸, 因為侉真係好醒, 做嘢好得, 口才又好, 回程嘅時候, 佢坐係我後面, 成四個鐘車, 但佢把口未停過, 但佢講嘅嘢又真係好有趣, 我越聽越想聽, 有時心諗, 如果我有佢咁醒就好喇, 不過可惜, 現實係無可能嘅.. 仲有樣嘢我好佩報佢嘅, 就係佢嘅酒量, 佢飲果啲啲矛台, 酒精高到可以點得著火, 但佢飲落去面不改容, 真係超勁, 唔通返大陸做幾年嘢, 真係可以練到超勁嘅酒量, 不過我又唔想, 因為咁飲法, 真係好傷個肝啫, 搵到錢, 都要有命洗先得架, 係味..?

小朋友屋企終於話約出黎傾婚事喇, 等咗咁耐, 卒之等到喇, 不過唔知撰日子會撰到幾時呢? 希望唔會太遲啦, 因為唔想再拖, 我好老喇, 好想係不久嘅將來可以有多個新成員..

呵呵.. 十點半喇, 係時候打比小朋友, 佢聽日又 a/n 超慘, 好彩星期一 係公假, 我可以陪佢... yeah..