一件信物...

已經有幾日無寫日記喇, 因為唔係日日有嘢值得寫嘛....一個平淡而開心嘅 weekend 又咁過咗喇, 小朋友可以陪我兩日, 佢星期五都唔舒服, 好彩星期六無事, 可以開開心心出去行街街, 食雪糕, 最重要嘅係我地買咗一對介子, 一早已經計劃好買隻銀做嘅, 因為遲啲先會正正經經買隻好嘅比佢, 將佢收歸我門下, 為奴為婢, 呵呵... 原本想去啲大嘅金鋪買, 但問咗幾間, 佢地都無買, 可能而家香港經濟真係好咗好多, 佢地都唔再買呢啲 cheap 嘢, 最後小朋友憑記憶, 搵到一間係旺角專賣銀器嘅鋪頭, 價錢真係超平, 買曬兩隻都唔駛兩舊水, 其實我知道小朋友唔想買貴嘢, 最初去啲大金鋪睇, 佢都唔多願意.. 佢就係一個咁簡單嘅人, 呢個都係我地係埋一齊嘅原因..其實一樣嘢, 經過包裝之後, 可以賣高好多價錢, 如果你地得閒, 可以去 sogo 同 taste, 比較吓佢地同街市和其他超市賣嘅嘢, 我個人覺得, 貨都係果啲, 只係包得靚一啲, 個價就差天共地喇, 我自問就唔識某某去果間 links of london 賣嘅嘢又幾特別, 可能啲 design 真係得好多掛.. 只知道呢啲嘢唔啱我... 而家我地帶緊果隻介子都好靚, 媽媽見到仲以為係白金, 仲問, "咁貴而家買白金", 當我話比佢知個價錢, 佢都忍唔住笑咗出黎... 嗯, 睇黎佢地都幾鐘意小朋友.. 好....!!

我地又去咗hagendize食雪糕, 但食食吓先發覺我地蠢咗...我地各自買咗一個球, 比起買一杯兩個球嘅貴好多架喎, 以我地兩杯加埋嘅價錢, 可以買杯三球架喇, 下次要醒啲, 夜晚又同屋企人去咗譚魚頭打邊爐, 都係食啲普通嘢, 但埋單先發覺啲下欄嘢都成舊水, 真係食水幾深.. 跟住去咗豐澤買洗衣機, 終於撰啱喇, 星期二送貨, 媽媽終於唔駛用手洗衫喇... 最後係去咗朗豪坊嘅滿記食糖水, 我嘅 weekend 就係咁過咗喇, 簡單但勁開心, 又可以陪女友, 又可以陪屋企, 夫復何求..?

小朋友, 睇黎你嘅廚藝越黎越好, 而家已經掌握得出神入化, 希望你黎緊繼續努力, 等我 "坐係到等食".. 呵呵.. 小弟又決定玩番遙控直昇機喇, 我隻 50翼手龍已經建做中, 如無意外, 下星期六應該有得玩喇.. yeah.. 好喇十一點三喇, 小弟都已經報告完畢, 係時候 gou gou chu.. 各位觀眾, 晚安...